នគរបាលបញ្ជូនខ្លួនផ្កាយ២ក្លែងក្លាយទៅតុលាការចាត់ការតាមនិតិវិធី
ភ្នំពេញ៖ នៅព្រឹកថ្ងៃទី៦ខែឧសភាឆ្នាំ២០២០នេះ កម្លាំងនគបាលព្រហ្មទណ្ឌ ក្រសួងមហាផ្ទៃ បានបញ្ជូនផ្កាយ២ក្លែងក្លាយទៅតុលាការករណីបោកលុយរត់ការចូលក្របខ័ណ្ឌនគរបាល ហើយ គំរាមបាញ់និងប្រើអាវុធខុសច្បាប់ ។
ជនសង្ស័យមានឈ្មោះ សេង សុភ័ក្រត្រា អាយុ៤៧ឆ្នាំ ស្នាក់នៅសង្កាត់ព្រែកលាប ខណ្ឌជ្រោយចង្វា រាជធានីភ្នំពេញ។
សូមរំលឹកថា ជនសង្ស័យត្រូវកម្លាំងនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ចាប់ខ្លួនកាលពីថ្ងៃទី០៤ខែឧសភាឆ្នាំ២០២០ នៅសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ បន្ទាប់ពីធ្វើសកម្មភាព គំរាមបាញ់សម្លាប់, គំរាមហែកកេរ្ដិ៍, ប្រើប្រាស់អាវុធដោយខុសច្បាប់ និងឆបោកលុយ រឿងរត់ការចូលក្របខ័ណ្ឌនគរបាល ។
សមត្ថកិច្ចអោយដឹងថា ជនសង្ស័យបានសារភាពថា ខ្លួនពិតជាបានក្លែងបន្លំជាមន្ដ្រីនគរបាលជាតិ ឋានន្ដស័ក្ដិផ្កាយពីរ នៅក្រសួងមហាផ្ទៃ ប្រាកដមែន និងបានយកប្រាក់ពីជនរងគ្រោះចំនួន១០,៥០០ដុល្លារ ដើម្បីរត់ការចូលក្របខ័ណ្ឌនគរបាលជាតិ តែរត់ការមិនបានហើយក៏ចាយអស់ទៅ ពេលជនរងគ្រោះទូរស័ព្ទទារលុយ ខ្លួនបានផ្ញើសារគំរាមបាញ់សម្លាប់ បើសិននៅតែទារលុយទៀត។ លុះដល់ថ្ងៃទី០៤ខែឧសភាឆ្នាំ២០២០ ក៏ត្រូវកម្លាំងសមត្ថកិច្ចឃាត់ខ្លួនតែម្ដង រួមជាមួយ អាវុធខ្លីមួយដើម ម៉ាក Glock 26 គ្មានលិខិតប្រើប្រាស់៕
