បើករថយន្តស៊េរីទំនើប ផ្ទុះអាវុធ១គ្រាប់ក្បែរលីហួរ ផ្អើលដល់សមត្ថកិច្ចខណ្ឌ៧មករា
ភ្នំពេញ៖ មានករណីផ្ទុះអាវុធចំនួន១គ្រាប់បង្កឲ្យមានការភ្ញាក់ផ្អើលដល់សមត្ថកិច្ច ទាំងអ្នកសារព័ត៌មាន កាលពីវេលាម៉ោង១និង៣០នាទីទាបភ្លឺ ឈានចូលថ្ងៃទី២០ ខែឧសភា ឆ្នាំ២០២០ តាមបណ្តោយផ្លូវព្រះមុន្នីរ៉េត ក្បែរស្ទុបនាងគង់ហុីង ស្ថិតក្នុងសង្កាត់ អូរឬស្សី២ ខណ្ឌ៧មករា រាជធានីភ្នំពេញ ។
យោងតាមប្រភពពីសមត្ថកិច្ចមូលដ្ឋានដែលប្រចាំការនៅគោលដៅក្បែរកន្លែងកើតហេតុបានឲ្យដឹងថា មុនដំបូងមានរថយន្តម៉ាក toyota Lang Cruiser ពណ៌ស ស៊េរីទំនើបមួយគ្រឿង មិនចាំស្លាកលេខ បានធ្វើដំណើរក្នុងទិសដៅពីលិចមកកើតយ៉ាងលឿន ពេលដែលមកដល់ចំណុចកើតហេតុ រថយន្តបង្កខាងលើបានបើកកញ្ចក់ឡាន រួចហូតកាំភ្លើងបាញ់១គ្រាប់ឡើងលើ រួចក៏បានបន្តដំណើរចេញពីកន្លែងកើតហេតុបាត់ស្រមោល។
ប្រភពដដែលបានបន្តថា ជនសង្ស័យដែលបាញ់បោះបង្កការភ័យខ្លាច មិនត្រូវបានស្គាល់អត្តសញ្ញាណនោះទេ មិនដឹងថាជាមនុស្សប្រុស ឬស្រី និងជាជនជាតិអ្វីនោះទេ។ បន្ទាប់មកសមត្ថកិច្ចមូលដ្ឋានបានចុះទៅរកសំបកផ្ទុះ ដើម្បីធ្វើការស្រាវជ្រាវបន្តតាមនីតិវិធី ៕
