នគរបាលខណ្ឌមានជ័យ ឃាត់ខ្លួនជនសង្ស័យម្នាក់ជាមុខសញ្ញាលួចកាច់សោរម៉ូតូ
ភ្នំពេញ៖ កម្លាំងអន្តរាគមន៍ នៃ អធិការដ្ឋាននគរបាលខណ្ឌមានជ័យ និងកម្លាំងនគរបាលប៉ុស្តិបឹងទំពុន១ បានសហការគ្នាចេញល្បាតក្នុងមូលដ្ឋាន ឃាត់ខ្លួនជនសង្ស័យម្នាក់រួមទាំងវត្ថុតាងមួយចំនួន៖ ហេតុការណ៍នេះបានកើតឡើងកាលពីវេលាម៉ោង១២និង៣០នាទី រំលងអាធ្រាត្រឈានចូលថ្ងៃទី២៦ខែឧសភាឆ្នាំ២០២០ នៅចំណុចផ្លូវលំ ភូមិ សន្សំកុសល៤ សង្កាត់ បឹងទំពន់ទី១ ខណ្ឌមានជ័យ រាជធានីភ្នំពេញ ។
ជនសង្ស័យមានឈ្មោះ អឿន សុភ័ក្រ្ក ភេទ ប្រុស អាយុ២១ឆ្នាំជនជាតិខ្មែរ ទីលំនៅ និង មុខរបរ មិនពិតប្រាកដ (ឃាត់ខ្លួនមានផ្ទុកសារធាតុញៀន) ។
ដោយឡែក វត្ថុតាងចាប់យករួមមាន ៖ ដែកមុខស្រួចរាងសំប៉ែតចំនួន០១ដើម,សោរទីបលេខ៨ចំនួន១ដើមនិងដែកឆាបចំនួន១ដើម។
លោកវរសេនីយ៍ឯក ម៉េង វិមានតារា អធិការនគរបានខណ្ឌមានជ័យបានឲ្យដឹងថា កាលពីវេលាម៉ោង១២និង៣០នាទីរំលងអាធ្រាត្រឈានចូលថ្ងៃទី២៦ខែឧសភាឆ្នាំ២០២០កម្លាំងនគរបាលប៉ុស្តិ៍បឹងទំពន់ទី១ និងកម្លាំងផ្នែកអន្តរាគមន៍ នៃអធិការដ្ឋាននគរបាលខណ្ឌមានជ័យ បានធ្វើការល្បាតពួនស្ទាក់នៅក្នុងមូលដ្ឋានខណៈមកដល់ចំណុចផ្លូវលំ ភូមិ សន្សំកុសល៤ សង្កាត់បឹងទំពន់ទី១ ខណ្ឌមានជ័យ រាជធានីភ្នំពេញ ស្រាប់តែឃើញជនសង្ស័យកំពុងដើរតាមផ្លូវម្នាក់ឯងដោយមានការសង្ស័យបានឃាត់ខ្លួនសួរនាំ និងឆែកឆេរ រកឃើញតែឧបករណ៍សម្រាប់កាច់សោរកម៉ូតូមានដូចជា ដែកមុខស្រួចរាងសំប៉ែតចំនួន០១ដើម-សោរទីបលេខ៨ចំនួន០១ដើម និង ដែកឆាប១ដើម លាក់ទុកជាប់ខ្លួន ពេលនោះសមត្ថកិច្ចក៏បាននាំខ្លួនជនសង្ស័យយកមកសាកសួរនៅស្នាក់ការនគរបាលប៉ុស្តិ៍ស្ទឹងមានជ័យទី២ ។
បច្ចុប្បន្ន ជនសង្ស័យរួមនិងវត្ថុតាងត្រូវបាននគរបាលប៉ុស្ដិ៍ស្ទឹងមានជ័យ២ ធ្វើកំណត់ហេតុបញ្ជួនមកឃុំខ្លួនជាបណ្ដោះអាសន្ននៅអធិការ នគរបាលខណ្ឌមានជ័យ ដើម្បីកសាងសំណុំរឿងចាត់បន្តតាមនីតិវិធីច្បាប់ ៕
