ក្រុមចោរធ្វើសកម្មភាពកាប់ប្លន់យកម៉ូតូបានសម្រេច នៅខណ្ឌកំបូល សមត្ថកិច្ចបានត្រឹមតែទៅនាំជនរងគ្រោះមកដាក់ពាក្យបណ្ដឹង
ភ្នំពេញ ៖ យុវជនម្នាក់ត្រូវជនសង្ស័យមួយក្រុមធ្វើសកម្មភាពធាក់ម៉ូតូផ្ដួលរួចយកពូថៅដេញកាប់ចំខ្នងរងរបួសស្រាល ប្លន់យកម៉ូតូឌ្រីមសង់២០១៩បានសម្រេច ជិះគេចខ្លួនបាត់ដោយសុវត្តិភាព មិនរំខាងដល់សមត្ថកិច្ច
ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង០៩និង៤០នាទីយប់ថ្ងៃទី៥ខែមិថុនាឆ្នាំ២០២០ នៅចំណុចដីវាល តាមបណ្តោយផ្លូវជាតិ លេខ៣ សង្កាត់ ភ្លើងឆេះរទេះ ខណ្ឌកំបូល រាជធានីភ្នំពេញ។
ជនរងគ្រោះមានឈ្មោះ យិល អ៊ិត ភេទប្រុស អាយុ១៨ឆ្នាំ ជនជាតិខ្មែរ មុខរបរលាងឡាន នៅសង្កាត់ និរោធ ខណ្ឌច្បារអំពៅ ស្នាក់នៅកន្លែងធ្វើការ មានស្រុកកំណើតនៅភូមិកំពង់ចិន ស្រុកទឹកឈូ ខេត្តកំពត ។ ម៉ូតូដែលក្រុមចោរប្លន់យកទៅម៉ាក ហុងដា ឌ្រីមC125ស៊េរីឆ្នាំ២០១៩ ពណ៌ខ្មៅ ពាក់ស្លាក លេខ ភ្នំពេញ1HI-8401 ។
បើតាមសម្ដីជនរងគ្រោះរៀបរាប់ប្រាប់ឲ្យដឹងថា មុនពេលកើតហេតុរូបគេបានខ្ចីម៉ូតូបងស្រីជិះ ពីច្បារអំពៅទៅ ផ្សារជម្ពូវ័ន បំណងដើររកការងារធ្វើ លុះពេលទៅដល់ក៏នាំមិត្តភ័ក្តប្រឡប់មកវិញដោយជិះម៉ូតូមួយម្នាក់តាមបណ្ដោយផ្លូវជាតិលេខ៤ ពេលមកដល់រង្វង់មូល ចោមចៅ បានបត់ទៅផ្លូវជាតិលេខ៣ទឹសដៅពីជើងទៅត្បូង ខណៈមកដល់ចំនុចកើតហេតុខាងលើស្រាប់តែលេចមុខក្រុមចោរ ជិះម៉ូតូមួយគ្រឿងគ្នា៣នាក់មិនចាំម៉ាកមិនចាំស្លាកលេខ ជិះស្របទឹសគ្នាហើយបើកលើកជើងធាក់ម៉ូតូរបស់គេបណ្ដាលឲ្យដួល។
ប្រភពបន្តថា ភ្លាមៗក្រុមចោរបានទាញពូថៅដេញកាប់រូបគេ សំណាងល្អ្រូវខ្នងតិចតួចរងរបួសស្រាលរត់ចោលម៉ូតូជនសង្ស័យឃើញឱកាសល្អក៏បានលើកម៉ូតូជិះគេចខ្លួនទៅបាត់ស្រមល ។
ក្រោយពេលកើតហេតុជនរងគ្រោះបានត្រឹមតែឈរអស់សង្ឃឹមនិងសោកស្ដាយម៉ូតូព្រោះជាម៉ូតូខ្ចីរបស់បងស្រីមួយសន្ទុះក្រោយមកគេឃើញសមត្ថកិច្ចចុះមកដល់កន្លែងកើតហេតុ ហើយបានត្រឹមតែនាំជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលភ្លើងឆេះរទេះ តែប៉ុណ្ណោះ ៕
