នគរបាលក្រុងស្វាយរៀង ឃាត់ខ្លួនចោរម្នាក់ក្រោយពេលធ្វើសកម្មភាពលួចម៉ូតូ Zoomer X
ស្វាយរៀង ៖ ជនស្ស័យជាចោរម្នាក់ត្រូវបានកម្លាំងនគរបាលក្រុងស្វាយរៀងឃាត់ខ្លួនបានបន្ទាប់ពីធ្វើសកម្មភាពលួចម៉ូតូប្រជាពលរដ្ឋមិនបានសម្រេច
ហេតុការណ៍នេះបានកើតឡើងកាលពីវេលាម៉ោង០៧និង០០នាទីព្រឹកថ្ងៃទី០៥ខែវិច្ឆិកាឆ្នាំ២០២០ នៅត្រង់ចំណុច ភូមិវាលយន្ត សង្កាត់ស្វាយរៀង ក្រុងនិងខេត្តស្វាយរៀង ។
ជនសង្ស័យដែលសមត្ថកិច្ចឃាត់ខ្លួនមានឈ្មោះ សុខ ទី ភេទប្រុស អាយុ២៥ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិរោងបន្លែ សង្កាត់ស្វាយរៀង ក្រុងស្វាយរៀង ។ ចំណែកជនរងគ្រោះឈ្មោះ គង់ សុផុន ភេទប្រុស អាយុ៤៨ឆ្នាំ ជនជាតិខ្មែរ មុខរបរមន្រ្តីរាជការ មានទីលំនៅភូមិ.សង្កាត់កើតហេតុខាងលើ និងម៉ូតូដែលជនសង្ស័យធ្វើសកម្មភាពលួចម៉ាកZoomer X សេរីឆ្នាំ២០១៦ ពណ៌ខ្មៅ-បៃតង ពាក់ផ្លាកលេខ ស្វាយរៀង 1F-1983 ។
សមត្ថកិច្ចបានអោយដឹងថា ជនសង្ស័យបានធ្វើសកម្មភាពលួច ម៉ូតូជនរងគ្រោះបានហើយក៏ជិះម៉ូតូគេចខ្លួនទៅទិសខាងកើត ភ្លាមៗត្រូវម្ចាស់ផ្ទះស្រែកឲ្យប្រជាពលរដ្ឋនៅក្បែរនោះជួយជិះម៉ូតូដេញតាមពីក្រោយ និងបានរាយការណ៍មកនគរបាលឲ្យជួយអន្តរាគមន៍។ ក្រោយពីទទួលបានព័ត៍មានភ្លាមៗនោះ នគរបាលជំនាញនៃអធិការដ្ឋាននគរបាលក្រុងស្វាយរៀង ប៉ុស្តិ៍នគរបាលរដ្ឋបាលសង្កាត់ស្វាយរៀង សហការជាមួយកម្លាំងអាវុធហត្ថ បានចេញដេញតាមជនសង្ស័យរហូតដល់ត្រង់ចំណុចខាងមុខអតីតបញ្ជាការដ្ឋានកងរាជអាវុធហត្ថខេត្ត ស្ថិតក្នុងភូមិរោងបន្លែ ក្រុងស្វាយរៀង ជនសង្ស័ក៏ផ្តួលម៉ូតូចោល ររួចរត់ចូលផ្ទះប្រជាពលរដ្ឋនៅក្បែរនោះ ហើយក៏ត្រូវសមត្ថកិច្ច ចាប់ឃាត់ខ្លួនបានតែម្តង។
បច្ចុប្បន្ន ជនសង្ស័យត្រូវបានបញ្ជូនទៅការិយាល័យជំនាញខេត្ត ធ្វើការសាកសួរដើម្បីកសាងសំណុំរឿងចាត់ការតាមច្បាប់៕ 
