លួចស៊ីម៉ង់ត៍ថៅកែ លក់រាប់ឆ្នាំបែករឿង ត្រូវដំណាងក្រុមហ៊ុន ឃាត់ខ្លួនប្រគល់ទៅឲ្យសមត្ថកិច្ចខណ្ឌដង្កោ
ភ្នំពេញ ៖ ជនសង្ស័យ៣នាក់ដែលជាតែកុងរថយន្តដឹកស៊ីម៉ង់ត៍របស់ក្រុមហ៊ុន ស៊ីហ៊ូហ៊ុយ គ្រុប ត្រូវបានដំណាងក្រុមហ៊ុនចាប់ប្រគល់ឲ្យសមត្ថកិច្ចនគរបាលខណ្ឌដង្កោ ក្រោយពីដឹងថាជនសង្ស័យទាំង ៣រូបនោះបានលួចស៊ីម៉ង់របស់ខ្លួនយកទៅលក់ទៅឲ្យក្រុមហ៊ុនផ្សេង
ករណីឃាត់ខ្លួននេះកាលពីថ្ងៃទី១ ខែធ្នូ ឆ្នាំ២០២០ វេលាម៉ោង៦និង០០នាទីល្ងាច ត្រង់ចំណុច ក្រុមហ៊ុន ស៊ីហ៊ូហ៊ុយ គ្រុប ស្ថិតនៅភូមិសំបួរ សង្កាត់ដង្កោ ខណ្ឌដង្កោ។
ជនសង្ស័ដែលសមត្ថកិច្ចឃាត់ខ្លួនបានទី០១មានឈ្មោះ ហយ ហាញ ភេទប្រុស អាយុ៣៩ឆ្នាំ មុខរបរបើករថយន្ត ស្នាក់នៅផ្ទះជួល ភូមិសំបួរ សង្កាត់ដង្កោ ខណ្ឌដង្កោ។ ទី០២ឈ្មោះ អុល អន ភេទប្រុស អាយុ៣៩ឆ្នាំ មុខរបរបើករថយន្ត ទីលំនៅភូមិកណ្តាល ឃុំលំហាច ស្រុក អង្គស្នួល ខេត្តកណ្តាល ទី០៣ឈ្មោះ ហយ បញ្ញា ភេទប្រុស អាយុ៣៣ឆ្នាំ មុខរបរ បើករថយន្ត ទីលំនៅភូមិអង្គដូនពិស ឃុំទឹកល្អក់ ស្រុកគងពិសី ខេត្តកំពង់ស្ពឺ ។
ចំណែកជនរងគ្រោះឈ្មោះ ងិន សុផារិន ភេទប្រុស អាយុ៣៣ឆ្នាំ មុខរបរប្រធានរដ្ឋបាលក្រុមហ៊ុនស៊ីហ៊ូហ៊ុយ ស្នាក់នៅផ្ទះជួល ស្ថិតនៅភូមិដំណាក់ធំ សង្កាត់ស្ទឹងមានជ័យ៣ ខណ្ឌមានជ័យ ។ តំណាងឱ្យក្រុមហ៊ុនស៊ីហ៊ូហ៊ុយ គ្រុប។
បេីតាមសម្ដីឈ្មោះ សំ សត្យា ភេទប្រុស អាយុ៣០ឆ្នាំ ជាមេការរបស់ក្រុមហ៊ុន ស៊ីហ៊ូហុយ គ្រុប បានអោយដឹងថា កាលពីដើមឆ្នាំ២០២០ មិនចាំថ្ងៃខែ ជនសង្ស័យទាំង៣នាក់ជាអ្នកបេីករថយន្តដឹកសុីម៉ង់ត៍ ចេញពីក្រុមហ៊ុនស៊ីហ៊ូហ៊ុយ ស្ថិតនៅភូមិសំបួរ សង្កាត់ដង្កោ ខណ្ឌដង្កោ ទៅដឹកស៊ីម៉ង់ត៍ពីរោងចក្រចក្រីទីង ស្ថិតនៅខេត្តកំពតមករាជធានីភ្នំពេញ ។ ប៉ុន្តែពេលជនសង្ស័យទាំង៣នាក់ខាងលើ បើករថយន្តដឹកស៊ីម៉ង់ត៍យកទៅដាក់ តាមដេប៉ូក្នុងរាជធានីភ្នំពេញ ពួកគេ (ជនសង្ស័យ) បានលួចបូមស៊ីម៉ង់ត៍យកទៅលក់ឱ្យម៉ូយផ្សេងៗ ក្នុង១លើកៗអស់ចំនួនពី៥០គីឡូក្រាម ទៅ៣០០គីឡូក្រាម ។
នៅពេលបុគ្គលិករបស់ក្រុមហ៊ុន ស៊ីហ៊ូហ៊ុយគ្រុប ទៅទូទាត់លុយពីភ្ញៀវនៅតាមដេប៉ូនីមួយៗ ភ្ញៀវបានឱ្យវិក្កយបត្រទូទាត់លុយ បាត់ ស៊ីម៉ង់ត៍ក្នុង១រថយន្តអស់ពី៥០គីឡូក្រាម ទៅ៣០០គីឡូក្រាម ។ ពេលនោះខាងក្រុមហ៊ុនបានហៅជនសង្ស័យមកធ្វើការសួរនាំ តែពួកគេ(ជនសង្ស័យ) បានឆ្លើយថា ការបាត់បង់ស៊ីម៉ង់ត៍ បណ្តាល មកពីជញ្ជីងថ្លឹងឡើង និងជញ្ជីងថ្លឹងចុះ រួចបុគ្គលិកក្រុមហ៊ុនស៊ីហ៊ូហុយ បានទៅធ្វើការត្រួតពិនិត្យ ជញ្ជីងនៅតាមដេប៉ូនីមួយៗ ឃើញថា ជញ្ជីងមានភាពប្រក្រតីត្រឹមត្រូវ ។
លុះដល់ថ្ងៃទី១ ខែធ្នូ ឆ្នាំ ២០២០ វេលាម៉ោង៦និង០០នាទីល្ងាច ប្រធានក្រុមហ៊ុនបានហៅជនសង្ស័យទាំង៣នាក់ ខាងលើមកធ្វើការសួរនាំម្តងទៀត ទើបពួកគេ (ជនសង្ស័យ) បានឆ្លើយសារភាពប្រាប់ថា ពួកគេ (ជនសង្ស័យ) ពិតជាបានលួចបូមស៊ីម៉ង់ត៍របស់ក្រមហ៊ុន យកទៅលក់ឱ្យម៉ូយផ្សេងៗ ពិតមែន កាលពី អំឡុងឆ្នាំ២០១៨ រួចបុគ្គលិកក្រុមហ៊ុនក៏បានធ្វើការត្រួតពិនិត្យទៅលើស៊ីម៉ង់ត៍ដែល បានបាត់បង់ឃើញថា ចាប់តាំងពីឆ្នាំ២០១៨ រហូតដល់ឆ្នាំ២០២០ មានការបាត់បង់ស៊ីម៉ង់ត៍ជាង១៩៨តោន គិតជាទឹកប្រាក់សរុបចំនួន ១៤,៨៥០ ដុល្លារ (មួយម៉ឺនបួនពាន់ប្រាំបីរយហាសិបដុល្លារអាមេរិក) ។
លោកវរសេនីយ៍ឯកជឹម ស៊ីថា អធិការនគរបាល ខណ្ឌដង្កោបានប្រាប់ឲ្យដឹងថា យោងតាមពាក្យបណ្ដឹងរបស់ដំណាងក្រុមហ៊ុននិងចម្លើយជនសង្ស័យដែលបានសារភាពថា ពួកគេពិតជាបានលួចស៊ីម៉ង់របស់ក្រុមហ៊ុនលក់ពិតប្រាកដមែនកាលពីឆ្នាំ២០១៨ រហូតមកដល់ឆ្នាំ២០២០នេះ ។
បច្ចុប្បន្ន ជនសង្ស័យទាំង៣ នាក់ត្រូវបានសមត្ថកិច្ចខណ្ឌដង្កោកសាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីចាត់ការតាមនីតិវិធីច្បាប់៕
