នគរបាលក្រុងប៉ោយប៉ែត បំបែក សម្បុក ចោរមួយសម្បុក ចាប់ខ្លួនបាន៦នាក់ យកមកបង្ហាញមុខ
បន្ទាយមានជ័យ ៖ កាលពីរសៀលថ្ងៃអាទិត្យ ទី៦ ខែធ្នូ ឆ្នាំ២០២០ អធិការនគរបាលក្រុងប៉ោយប៉ែត បានបង្ហាញ មុខក្រុមជនសង្ស័យ ដែលតែងតែ ធ្វើសកម្មភាព លួច,ឆក់,ប្លន់នៅក្នុងក្រុងប៉ោយប៉ែត ដោយដកហូតម៉ូតូបានចំនួន៥គ្រឿង និងប្រគល់ ម៉ូតូចំនួន៣គ្រឿង ទៅម្ចាស់ដើម្បីវិញ ឯ២គ្រឿងទៀត កំពុងស្វែង រកម្ចាស់ ។
សូមបញ្ជាក់ថា កាលពីថ្ងៃទី០៤ ខែ ធ្នូ ឆ្នាំ ២០២០ កម្លាំងនគរបាលជំនាញ ក្រុងប៉ោយប៉ែតបានទទួលបណ្តឹងពីឈ្មោះ គឹម ណាវី ភេទស្រីអាយុ៣៧ឆ្នាំជនជាតិខ្មែរ មុខរបរ លក់ដូរ មានទីលំនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ថាខ្លួនបាន បាត់ម៉ូតូមួយគ្រឿងម៉ាកស៊ូមេីរអិចព៍ណស ក្រហមស្លាកលេខបន្ទាយមានជ័យ 1T-៨៤៥៥ នៅចំណុចភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត រួមជាមួយបណ្តឹង របស់ លោកសំ សុជា ភេទប្រុសអាយុ២៧ ឆ្នាំបាត់ម៉ូតូហុងដាឌ្រីមពណ៌ខ្មៅស្លាកលេខបន្ទាយមានជ័យ ១N-១៨៨៤ កាលពីថ្ងៃទី៣០ខែ១១ឆ្នាំ២០២០។ បណ្តឹងរបស់ឈ្មោះ ហាក់ ឆ័ងហ៊ុយ ភេទប្រុសអាយុ២៣ឆ្នាំ ជនជាតិខ្មែរ បាត់ម៉ូតូម៉ាកវេវពណ៌ខ្មៅ បិតស្កុតព៍ណទឹកបិច ។
ដោយមានការយកចិត្តទុកដាក់ ពីលោក ឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងមានការសម្រួបសម្រួល ពី ព្រះរាជអាជ្ញា ខេត្តបន្ទាយមានជ័យ។
លោកឧត្តមសេនីយ៍ត្រី នូ ជីវ័ន្ត ដឹកនាំជំនាញ ព្រហ្មទណ្ឌ និងជំនាញរបស់ក្រុងប៉ោយប៉ែត ក្រោមការដឹកនាំរបស់ លោកវរសេនីយ៍ ឯក សៅ សារឿន អធិការនគរបាលក្រុងប៉ោយប៉ែត បានចុះធ្វើការស្រាវជ្រាវឈានដល់ការឃាត់ខ្លួនជនស្ស័យជាបន្តបន្ទាប់ ។
សមត្ថកិច្ចបានអោយដឹងថាជនសង្ស័យជាមុខសញ្ញាលួចរួមមាន ៖១ • ឈ្មោះ រឿន ពិសិទ្ធ ភេទប្រុស អាយុ២៥ឆ្នាំ មានទីលំនៅភូមិបាលិ លេយ្យ១ សង្កាត់ប៉ោយប៉ែត ក្រុងប៉ោយប៉ែត ជាអ្នករកទីផ្សារលក់ម៉ូតូដែលបក្ខពួកឈ្មោះ ម៉ៅ មករា លួចបាន ទៅអោយ ហេង ចាន់ថា ។
២ • ឈ្មោះ ម៉ៅ មករា ហៅ អារាមីន ភេទប្រុសអាយុ១៦ឆ្នាំ មានទីលំនៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ជាជនដៃដល់កាច់សោកម៉ូតូសកម្ម។
៣• ឈ្មោះ តឿន ពាង ហៅ មុឹន ហៅរើន ភេទប្រុសអាយុ១៦ឆ្នាំ មានទីលំនៅភូមិចាន់គីរី សង្កាត់ប៉ោយប៉ែត ក្រុងប៉ោយប៉ែត ជាបក្ខពួកជាមួយ ម៉ៅ មករា ។
៤• ឈ្មោះ កាន រ៉ង ភេទប្រុស អាយុ១៦ឆ្នាំ មានទីលំនៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែតជាបក្ខពួករបស់ ម៉ៅ មករា ។ ឃាត់ខ្លួនបាន នៅថ្ងៃទី០៤ ខែធ្នូ ឆ្នាំ២០២០ នៅក្រុង ប៉ោយប៉ែត ។
៥ ឈ្មោះ ហេង ចាន់ថា ភេទប្រុស អាយុ២៨ឆ្នាំមានទីលំនៅ ភូមិប៉ោយតាសេក ឃុំបឹងព្រីង ស្រុកថ្មគោល ខេត្តបាត់ដំបង ជាអ្នកទទួលទិញម៉ូតូដែលលួចបាន។
៦• ឈ្មោះ វឿ សូវៀត ភេទប្រុស អាយុ២៦ឆ្នាំ មានទីនៅភូមិបឹងព្រីង ឃុំបឹងព្រីង ស្រុកថ្មគោលខេត្តបាត់ដំបង ជាជាងជួសជុលម៉ូតូនឹងកែឆ្នៃ ។ ឃាត់បាននៅវត្តបឹងត្រាវ ថ្ងៃទី០៥ ខែធ្នូ ឆ្នាំ២០២០ ។
សមត្ថកិច្ចបន្តថា ចំពោះម៉ូតូដែលបានដាក់ បណ្តឹងចំនួន៣គ្រឿងខាងលើសមត្ថកិច្ច បានស្រាវជ្រាវដកហូតបាននៅបឹងព្រីង ថ្មគោល០១គ្រឿង ម៉ាកវេវពណ៌ខ្មៅ បិតស្កុតពណ៌ទឹកបិច និងនៅឃុំភ្នំធំ ម៉ូតូ២គ្រឿងម៉ាកស៊ូម័រពណ៌ស និងម៉ាកហុងដាឌ្រីម ពណ៌ខ្មៅ និងបានប្រគល់ជូនទៅម្ចាស់វិញ ។ ចំណែក២គ្រឿងទៀត កំពុងស្វែងរកម្ចាស់។
-លោកវរសេនីយ៍ ឯក សៅ សារឿន អធិការនគរបាលក្រុងប៉ោយប៉ែត ស្នើរសុំដល់បងប្អូនប្រជាពលរដ្ឋ មេត្តាយកចិត្តទុកដាក់ថែរក្សាទ្រព្យសម្បត្តិមានតម្លៃ ជាពិសេស ម្ចាស់ផ្ទះសំណាក់ ផ្ទះជួល បន្ទប់ជួល សូម ដាក់កាំមេរ៉ា សុវត្ថិភាព ងាយស្រួលពេលមាន បញ្ហា សមត្ថកិច្ច ងាយកំណត់មុខសញ្ញា ជនសង្ស័យ ។
បច្ចុប្បន្ន ជនសង្ស័យត្រូវបាននគរបាលជំនាញ កសាងសំណុំរឿងបញ្ជួនទៅតុលាការ ចាត់ការបន្តតាមនិតិវិធីច្បាប់ ៕
