ជិះម៉ូតូទៅឆក់ទូរស័ព្ទអ្នកជិះកង់បី តែមិនបានសម្រេច បណ្ដាលឲ្យក្រឡាប់កងបី និងដួលម៉ូតូ ចំណែកជនសង្ស័យរត់ចោលម៉ូតូមួយគ្រឿង

ភ្នំពេញ៖ ជនសង្ស័យ៣នាក់ជិះម៉ូតូ២គ្រឿងបានធ្វើសកម្មភាពឆក់ទូរស័ព្ទដៃពីបុរសម្នាក់ ខណៈកំពុងជិះម៉ូតូកង់បីមិនបានសម្រេចបណ្ដាលឲ្យក្រឡាប់កង់បីនិងដួលម៉ូតូមួយគ្រឿងរួចរត់ឡើជិះម៉ូតូបក្ខពួកមួយគ្រឿងទៀតគេចខ្លួន បាត់ស្រមោល បន្សល់ទុកម៉ូតូមួយគ្រឿង។
ហេតុការណ៍បង្កឲ្យមានការភ្ញាក់ផ្អើលនេះកើតឡើងកាលពីវេលាម៉ោង២និង៤០នាទីយប់រំលងអធ្រាត្រឈានចូលថ្ងៃសុក្រ ទី១១ ខែធ្នូឆ្នាំ២០២០ ស្ថិតនៅតាមបណ្ដោយផ្លូវ៣៣៥ ជិតនិងរង្វង់មូលកាំកូសុីធី ក្នុងសង្កាត់ទួសង្កែទី១ ខណ្ឌឫស្សីកែវ រាជធានីភ្នំពេញ។

តាមការរៀបរាប់ពីនាក់បើកម៉ូតូកង់បីបាន ប្រាប់ឲ្យដឹងថាមុនកើតហេតុមានភ្ញៀវបានខលទូរស័ព្ទឲ្យគាត់មកយកនៅម្ដុំផ្សារផ្លាហ្សា ក្បែរស្ពានអាកាសផ្សារដីហុយ ដោយឲ្យរូបគាត់ ដឹកទៅម្ដុំរង្វង់មូលកាំកូសុីធី ដោយធ្វើដំណើរតាមបណ្ដោយផ្លូវ៣៣៥ ក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើ ក៏លេចមុខជនសង្ស័យចំនួន៣នាក់ជិះម៉ូតូ២គ្រឿង ដោយមួយគ្រឿងមិនចាំម៉ាក ជិះគ្នាពីរនាក់ ចំណែកអ្នកជិះធ្វើសកម្មភាពម្នាក់ឯង ជិះម៉ូតូមួយគ្រឿងម៉ាក ហុងដាឌ្រីមសង់ ស៊េរីឆ្នាំ២០១៨ ពណ៌ខ្មៅពាក់ស្លាកលេខ ភ្នំពេញ 1GW-4749 បានធ្វើដំណើរមកពីក្រោយរួចធ្វើសកម្មភាពឆក់ ទូរស័ព្ទដៃពីបុរសជាភ្ញៀវកំពុងជិះកង់បី តែមិនបានសម្រេចដោយមានការប្រទាញប្រទង់គ្នា បណ្ដាលឲ្យម៉ូតូកង់បីក្រឡាប់ និងម៉ូតូជនសង្ស័យក៏ដួល។ ប្រភពដដែលបានបន្តទៀតថា បន្ទាប់មកជនសង្ស័យបានងើបឡើងលើកម៉ូតូជិះបានបន្តិចក៏ស្រាប់តែដួលម្ដងទៀត។ ពេលនោះរូបគាត់បានស្រែកថាចោរៗ ធ្វើឲ្យជនសង្ស័យភ័យស្លន់ស្លោបានរត់ឡើងជិះម៉ូតូបក្សពួករបស់ខ្លួនគេចខ្លួន បាត់ស្រមោល បន្សល់ម៉ូតូទុកមួយគ្រឿង។ ចំណែកម៉ូតូកង់បីរងការខូចខាតផ្នែកខាងមុខ យ៉ាងដំណំ។

ក្រោយកើតហេតុសមត្ថកិច្ចមូលដ្ឋានបានចុះមកដល់បានធ្វើការសួរនាំរួចយកម៉ូតូជនសង្ស័យ និងជនរងគ្រោះមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទួលសង្កែទី១ ងាយស្រួលសមត្ថកិច្ចស្រាវជ្រាវចាប់ខ្លួនសង្ស័យមកផ្តន្ទាទោសតាមផ្លូវច្បាប់៕