រថយន្តដឹកស្រូវក្រឡាប់សង្កត់តៃកុងស្លាប់គួរឲ្យសង្វេក

ភ្នំពេញ៖ បុរសម្នាក់ត្រូវរថយន្ដដឹកស្រូវធន់ធំ១គ្រឿងក្រឡាប់គៀបជាប់ស្លាប់គួរឲ្យរន្ធត់ ចំណែក២នាក់ ទៀតរបួសស្រាល
ហេតុការណ៍គ្រោះថ្នាក់ចរាចរណ៍នេះបានកើតឡើង កាលពីវេលាម៉ោង០១និង១០នាទីរំលងអាធ្រាតឈានចូលថ្ងៃទី១០ខែកញ្ញឆ្នាំ២០១៨ នៅតាមបណ្ដោយផ្លូវ ជាតិលេខ៣ត្រង់ចំណុចស្ពាន៧មករា ស្ថិតក្នុងសង្កាត់ ក្រាំងពង្រ ខណ្ឌដង្កោ រាជធានីភ្នំពេញ ។

ជនរងគ្រោះដែលស្លាប់បាត់បង់ជីវិតមានឈ្នោះ ម៉ៅង រ៉ាម៉ាន ភេទប្រុស អាយុ២៦ ឆ្នាំ មុខរបរ បើកឡាន រស់ នៅភូមិ កន្លុងមាស ឃុំព្រៃល្វៀល ស្រុកព្រៃកាប្បាស់ខេត្តតាកែវ និងបុរស២នាក់ទៀតរងរបួសស្រាល មិនស្គាល់អត្តសញ្ញាណក្រោយកើតហេតុគេចខ្លួនបាត់ ។

បើតាមប្រភពព័ត៌មានពីប្រជាពលរដ្ឋនៅកន្លែងកើត ហេតុបានឲ្យដឹងថា មុនពេលកើតហេតុគេឃើញ រថយន្តធន់ធំយីឌុប ពាក់ស្លក់លេខ តាកែវ3A -2545 បើកបរ និងរួមដំណើរដោយបុរស៣នាក់ធ្វើដំណើរតាមបណ្ដោយផ្លូវជាតិលេខ៣ ទិសដៅជើងទៅត្បូងក្នុងល្បឿនយ៉ាងលឿនដឹកស្រូវពេញ ខណៈមកដល់ស្ពាន ប្រាំពីមករា(៧មករា)ដែលជាចំណុចកើតហេតុរថយន្តបានរេចង្កូតក្រឡាប់អូសប្រហែល១០ម៉ែត្រចាក់ស្រូវចោលពេញផ្លូវ រថយន្តគៀបជាប់បុរសម្នាក់ ស្លាប់យ៉ាងអាណោចអធម៌ ។ ចំណែកបុរស២នាក់ ទៀតបន្ទាប់ពីកើតហេតុបានគេចខ្លួនបាត់ ។

ក្រោយពេលកើតហេតុសមត្ថកិច្ច បានយករថយន្ដស្ទួចមកស្ទួចយករថយន្តគ្រោះថ្នាក់ទៅរក្សាទុកនៅការិយាល័យចរាចរណ៍រាជធានីភ្នំពេញរងចាំដោះ ស្រាយពេលក្រោយ ។ ចំណែកសពជនរងគ្រោះត្រូវ បានសមត្ថកិច្ចធ្វើកំណត់ហេតុប្រគល់ឲ្យសាច់ញាតិយកទៅធ្វើបុណ្យតាមប្រពៃណី ៕