រថយន្តស្ទូច១គ្រឿង ខណៈពេលកំពុងបើកបរលឿន ជាន់ហ្វ្រាំងអត់ស៊ី តៃកុងក្រឡេកមើលសងខាងសុទ្ធតែឡានទំនើប ក៏សំរេចចិត្តបុកគូថឡានកុងតឺន័រពីក្រោយដែលកំពុងឈប់ភ្លើងស្តុបក្រហមពេញទំហឹង..!
ភ្នំពេញ៖ ហេតុការណ៍នេះបានកើតឡើង កាលពីវេលាម៉ោង១១និង៤៥នាទីថ្ងៃត្រង់ ថ្ងៃទី៣ ខែកុម្ភៈ ឆ្នាំ២០២១ នៅតាមផ្លូវ៥០ម៉ែត្រ ត្រង់ចំណុចភ្លើងស្តុបព្រែកជ្រៃ ស្ថិតនៅក្នុងភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ ។
ករណីខាងលើនេះ បណ្ដាលឲ្យដងសន្ទូចបុកទម្លុះទូកុងតឺន័រខូចខាតទ្វារ១ចំហៀង ចំណែកឯកាប៊ីរថយន្តបង្កនេះ បានបុកពីក្រោយកន្ទុយរ៉ឺម៉កកុងតឺន័រពេញទំហឹងរងការខូចខាតក្រពឹតរួញទាំងស្រុង ក្លាយជាអេតចាយ និងបានបណ្ដាលឲ្យអ្នកជិះម្នាក់រងរបួសធ្ងន់ផងដែរ ។
រថយន្តស្ទូចដែលបើកបុករថយន្តកុងតឺន័រពីក្រោយនោះ ម៉ាកហ៊ីយ៉ាន់ ដាយពណ៍ស ពាក់ស្លាកលេខព្រៃវែង 3A-1814 ដឹកទូកាហ្វេ និងសម្ភារៈប្រើប្រាស់ក្នុងផ្ទះ បើកបរដោយបុរសមិនស្គាល់ឈ្មោះម្នាក់មិនបានរងរបួសនោះទេ ប៉ុន្តែអ្នកជិះរួមដំណើរជាមួយរងរបួសធ្ងន់ ។ ចំណែករថយន្តដឹកកុងតឺន័រម៉ាកហ៊ីណូ ពណ៍ស ក្បាលពាក់ស្លាកលេខ 3F-0062 និងកន្ទុយរ៉ឺម៉កដឹកទូកុងតឺន័រពាក់ស្លាកលេខភ្នំពេញ4A-5457 រងការខូចខាតទ្វារទូកុងតឺន័រ១ចំហៀង និងក្បាំភក់បន្តិចបន្តួចតែប៉ុណ្ណោះ ហើយអ្នកបើកបរក៏មិនត្រូវបានស្គាល់ឈ្មោះដែរ ។
តាមប្រភពព័ត៌មានបានឲ្យដឹងថា នៅមុនពេលកើតហេតុរថយន្តទាំង២គ្រឿងបានបើកបរធ្វើដំណើរក្នុងទិសដៅស្របគ្នាពីលិចទៅកើត តាមផ្លូវ៥០ម៉ែត្រ ហើយរថយន្តម៉ាកហ៊ីណូដឹកកុងតឺន័រ បានទៅដល់ភ្លើងស្តុបមុន និងបានឈប់ស្ងៀម ព្រោះភ្លើងស្តុបលោតពណ៍ក្រហម ។ ខណៈនោះរថយន្តម៉ាកហ៊ីយ៉ាន់ដាយដឹកទូកាហ្វេ និងសម្ភារៈប្រើប្រាស់ក្នុងផ្ទះ បានទៅដល់ដែរ ហើយក៏ជ្រុលទៅបុកពីក្រោយរថយន្តកុងតឺន័រដែលកំពុងឈប់ស្ងៀមពេញទំហឹង ។
ដោយដងសន្ទូចបានបុកទម្លុះទ្វារទូកុងតឺន័រ ចំណែកកាប៊ីនរថយន្តបុកចំកន្ទុយរ៉ឺម៉ករថយន្តកុងតឺន័រ បណ្ដាលឲ្យរងការខូចខាតក្រពឹតខ្ទេចកាប៊ីនខ្លួនឯង ហើយអ្នកអ្នកបើកបរអត់របួសទេ ប៉ុន្តែអ្នករួមដំណើរម្នាក់រងរបួសធ្ងន់ហើយ ត្រូវបានសាច់ញាតិនាំទៅកាន់មន្ទីរពេទ្យភ្លាមៗតែម្ដង ។
ដោយឡែកបុរសអ្នកបើកបររថយន្តបង្កបាននិយាយថា នៅមុនពេលកើតហេតុ ខណៈពេលបើកបររថយន្តទៅដល់ត្រង់ចំណុចកើតហេតុឃើញស្តុបលោតភ្លើងក្រហមគាត់បានជាន់ហ្វ្រាំងរថយន្តបន្ថយល្បឿនបម្រុងឈប់ ហើយក៏ជាន់ជាប់មិនអីនោះទេ ។ ប៉ុន្តែពុំទាន់បានឈប់ផងកំពុងតែបើកក្នុងល្បឿនយឺតៗ ស្តុបបានលោតភ្លើងពណ៍ខៀវជាសញ្ញាឲ្យបន្តដំណើរទៅមុខទៀត ទើបគាត់ជាន់ហ្គារបន្ថែមល្បឿន ហើយបានវាក់ជាមួយរថយន្តកុងតឺន័រនៅខាងមុខដែលភ្លើងខៀវ ហើយមិនទាន់ចេញដំណើរ ។ ខណៈនោះគាត់បានជាន់ហ្វ្រាំងដើម្បីឈប់ ប៉ុន្តែអត់ស៊ីជាន់ទៅរឹងៗ ហើយក្រឡេកមើលទៅខាងស្ដាំដៃសុទ្ធតែរថយន្តទំនើបៗទើបសម្រេចចិត្តកាច់ចិត្តកាច់ចង្កូតសំដៅបុកពីក្រោយរថយន្តកុងតឺន័រនេះតែម្ដង ។
ក្រោយពេលកើតហេតុកម្លាំងនគរបាលប៉ុស្តិ៍ដង្កោ បានចុះទៅកាន់ទីតាំងខាងលើធ្វើការគូសវាសរួចរាល់បានយករថយន្តចេញកុំឲ្យមានការកកស្ទះចរាចរណ៍ បន្ទាប់មកបានភាគីទាំងសងខាងធ្វើការសម្របសម្រួលគ្នាដើម្បីបញ្ចប់រឿង ៕
