ភ្លើងឆាបឆេះការ៉ាស់សាំងតេលាក្រុងសួង អស់ឡាន២គ្រឿង ម៉ូតូ៣គ្រឿង រុឺម៉កម៉ូតូ១គ្រឿង.!

ខេត្តត្បូងឃ្មុំ៖ ដេប៉ូតេលា មួយកន្លែង ត្រូវបានភ្លើងឆាបឆេះ ផ្តើមចេញពីឆ្លងចរន្តទុស្សេម៉ូទ័របាញ់ប្រេងសាំង រាលដាលឆេះម៉ដ្ឋ បង្កឲ្យភ្ញាក់ផ្អើលកាលពីវេលាម៉ោង៧និង៣០នាទីព្រឹក ថ្ងៃទី២១ ខែកុម្ភៈ ឆ្នាំ២០២១ នៅសង្កាត់សួង ក្រុងសួង ខេត្តត្បូងឃ្មុំ ។

សមត្ថកិច្ចឲ្យដឹងថា ការ៉ាស់សាំងដែលអគ្គិភ័យឆាបឆេះខាងលើនេះមានម្ចាស់ឈ្មោះ តែ តុងហ៊ុយ និងប្រពន្ធឈ្មោះ អ៊ា ស្រី ។ ហើយចំពោះមូលហេតុនៃការឆាបឆេះនេះឡើងបណ្តាលមកពីឆ្លងចរន្តអគ្គិសនីទូម៉ូទ័រក្បាលបាញ់សាំង បង្កជាផ្កាភ្លើងឆាបឆេះឡើងតែម្តង ។

ក្រោយពីហេតុការណ៍កើតឡើងភ្លាមៗ កម្លាំងសមត្ថកិច្ច រថយន្តពន្លត់អគ្គិភ័យចំនួន២៥គ្រឿង របស់អធិការដ្ឋានស្រុក ស្នងការខេត្តត្បូងឃ្មុំ ស្នងការខេត្តកំពង់ចាម សហការបាញ់ពន្លត់ភ្លើង រហូតដល់វេលាម៉ោង៩និង៣០នាទីព្រឹកថ្ងៃដដែលទើបភ្លើងរលត់ទាំងស្រុង ។

ការ៉ាស់សាំងត្រូវបានក្លាយជាចំណីអគ្គិទាំងស្រុង ឆេះកុងតៃសម្រាប់ចាក់ប្រេងអស់២គ្រឿង រថយន្ត២គ្រឿង ម៉ាក ឡិចសុីស ៣៣០ មួយគ្រឿង រថយន្តកូរ៉េ ២តោនកន្លះ១គ្រឿង ប្រេងម៉ាសុីន២០កេស ម៉ូតូ៣គ្រឿង រុឺម៉កមូតូ១គ្រឿង រួមទាំងថវិការ និងសម្ភារៈមួយចំនួនទៀត តែមិនមាននរណាម្នាក់រងរបួសនោះឡើយ ៕