នគរបាលខណ្ឌដង្កោឆ្មក់បង្ក្រាបទីតាំងជល់មាន់ ចាប់បានរថយន្ត២គ្រឿង និងម៉ូតូ៥គ្រឿង មាន់ជល់១ក្បាល
ភ្នំពេញ ៖ កម្លាំងសមត្ថកិច្ចចម្រុះ នៃគណៈបញ្ចាការឯកភាពខណ្ឌដង្កោ បានឆ្មក់ចុះបង្ក្រាបទីតាំងជល់មាន់មួយកន្លែងក្នុងភូមិបាគូរ សង្កាត់ដង្កោ ខណ្ឌដង្កោ រាជធានីភ្នំពេញកាលពីវេលាម៉ោង១រសៀល ថ្ងៃទី២៤ ខែសីហា ឆ្នាំ២០២១ ដោយចាប់ដកហូតវត្ថុតាងមួយចំនួន រីឯអ្នកលេងដឹងខ្លួនរត់បាត់អស់ ។
ក្នុងប្រតិបត្តិការណ៍ខាងលេីនេះ មានការចូលរួមសហការពីកម្លាំងគណៈបញ្ចាការឯកភាពខណ្ឌដង្កោ កម្លាំងសមត្ថកិច្ចប៉ុស្ដិ៍រដ្ឋបាលដង្កោ និងមន្ត្រីជំនាញព្រហ្មទណ្ឌខណ្ឌដង្កោ បានធ្វេីការចុះបង្ក្រាបទីតាំងជល់មាន់ខាងលេី តែធ្វេីឲ្យក្រុមអ្នកញៀនល្បែងដឹងខ្លួនទាន់ក៏នាំគ្នារត់គេចខ្លួនបាត់អស់ ដោយបន្សល់ទុកនូវរថយន្តចំនួន២គ្រឿង( Ford Ranger ពណ៌ស ពាក់ស្លាកលេខភ្នំពេញ 2BF-8779 និង Toyota Prius ពណ៌ខៀវ ពាក់ស្លាកលេខភ្នំពេញ 2BD-4775 ) , ម៉ូតូចំនួន៥គ្រឿង និងមាន់គក១ក្បាល ។
ក្រោយពីបញ្ចប់ប្រតិបត្តិការណ៍នេះរួចរាល់ កម្លាំងគណៈបញ្ចាការឯកភាពខណ្ឌដង្កោ បានធ្វេីការដឹកបញ្ចូនវត្ថុតាងមករក្សាទុកនៅប៉ុស្ដិ៍នគរបាលរដ្ឋបាលដង្កោ ដេីម្បីឲ្យមន្ត្រីយុត្តិធម៌អនុវត្តន៍តាមនីតិវិធីច្បាប់ ៕
