សង្ស័យភ្លើងប្រច័ណ្ឌ បុរសចំណាស់ម្នាក់យកកាំបិតចុងស្រួចចាក់សម្លាប់ប្រពន្ធ រួចសម្លាប់ខ្លួនឯងតាមក្រោយ
ភ្នំពេញ៖ បុរសវ័យចំណាស់ម្នាក់ បានធ្វើទារុណកម្មទៅលើប្រពន្ធ ដោយយកខ្សែភ្លើងចងជើងប្រពន្ធ បន្ទាប់មកក៏បានយកកាំបិតចុងស្រួច ចាក់សំដៅទៅលើបំពង់-ក ប្រពន្ធ បណ្ដាលអោយស្លាប់បាត់បង់ជីវិត រួចក៏បានយកកូនកាំបិតចាក់សម្លាប់ខ្លួនឯងតាមក្រោយ បណ្ដាលអោយ ស្លាប់បាត់បង់ជីវិតនៅកន្លែងទាំងពីរនាក់
ហេតុការណ៍ដ៏រន្ធត់នេះ បានកើតឡើង នៅវេលាម៉ោង២រំលងអធ្រាត្រ ឈានចូលថ្ងៃសៅរ៏ ទី២៥ ខែកញ្ញា ឆ្នាំ២០២១ ស្ថិតនៅតាមបណ្ដោយផ្លូវបេតុង៤៥BT ក្នុងភូមិត្នោតជ្រុំ៣ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ។
តាមសម្ដីកូនស្រីទី២ របស់ជនរងគ្រោះបានឲ្យដឹងថា៖ នៅមុនពេលកើតហេតុ ខ្លួនកំពុងដេកស្រាប់តែលឺសម្លេងប្រទូសសារាយគ្នា នៅក្នុងបន្ទប់ដេករបស់ឪពុកម្តាយ ពេលនោះខ្លួនក៏បានឡើងទៅមើល ស្រាប់តែឃើញម្តាយដេកផ្កាប់មុខ នៅក្រៅបន្ទប់ដោយជើងទាំងពីរ ជាប់ចំណងជាមួយនឹងខ្សែភ្លើង ។ ឃើញដូចនេះខ្លួនស្ទុះទៅឱបម្តាយ រួចបីត្រកងឲ្យផ្ងារមុខឡើង ទើបដឹងថាម្តាយផុតដង្ហើម ភ្លាមៗខ្លួនក៏បានរត់ចុះទៅបិទភ្លើងបារ៉ែតនៅក្រោមផ្ទះ លុះឡើងមកលើវិញស្រាប់តែឃើញឪពុក កំពុងតែចាក់សម្លាប់ខ្លួនឯងនៅក្នុងបន្ទប់ ដោយប្រើកាំបិតចុងស្រួច ។
បុរសជាប្តីមានឈ្មោះ ឡោ សុធាវី អាយុ ៦០ឆ្នាំ អតីត ជាយោធិនពិការ។
ស្ត្រីជាប្រពន្ធឈ្មោះ អាង ស៉ីគូ អាយុ៥២ឆ្នាំ មុខរបរ មេផ្ទះ មានកូន៤នាក់ ស្រី៣ ប្រុសមួយ ។
ក្រោយពេលកើតហេតុ សមត្ថកិច្ចមូលដ្ឋាន បានចុះមកដល់ទីតាំងផ្ទះកើតហេតុខាងលើ ធ្វើការពិនិត្យទៅលើសពរួចរុំព័ទ្ធខ្សែដើម្បីរង់ចាំ សមត្ថកិច្ចជំនាញ មកធ្វើកោសល្យវិច្ឆ័យ ស្រាវជ្រាវជាបន្ត ចំណែកសព រង់ចាំក្រុមគ្រូពេទ្យ យកសំណាក ស្វែងរកមេរោគកូវីដ-១៩ ទើបប្រគល់ឲ្យក្រុមគ្រួសារ យកធ្វើបុណ្យ តាមប្រពៃណី៕
