សមត្ថកិច្ចខណ្ឌពោធិសែនជ័យឃាត់ខ្លួនចោរគាស់ផ្ទះបាន២នាក់ក្នុងចំណោមបក្ខពួក៤នាក់
ភ្នំពេញ ៖ កម្លាំងនគរបាលខណ្ឌពោធិសែនជ័យ ល្បាតក្នុងមូលដ្ឋាន ឃាត់ខ្លួនក្រុមចោរកំពុងធ្វេីសកម្មភាពគាស់ផ្ទះប្រជាពលរដ្ឋបានចំនួន២នាក់ ៖ ហេតុការណ៍នេះកេីតឡេីងកាលពីវេលាម៉ោង០១និង០៥នាទីរំលងអាធ្រាតថ្ងៃទី១៩ខែមិនាឆ្នាំ២០២៣ នៅចំណុចផ្ទះល្វែង ស្ថិតក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យរាជធានីភ្នំពេញ ។
សមត្ថកិច្ចបានឲ្យដឹងថា ជនសង្ស័យ ដែលឃាត់ខ្លួន ៖ ទី១ -ឈ្មោះ ទូច សុខន ភេទប្រុស កើតឆ្នាំ១៩៨០ មុខរបរបើកបរផាស់អាប់ ។
-ទី២-ឈ្មោះ ភឹម ភារុណ ភេទប្រុស កើតឆ្នាំ២០០៤ មុខរបរមិនពិតប្រាកដ ។
សមត្ថកិច្ចបានឲ្យដឹងទៀតថា មុនពេលកើតហេតុ វេលាម៉ោង០១និង០៥នាទី កម្លាំងសមត្ថកិច្ចបានធ្វើការល្បាតនៅក្នុងមូលដ្ឋានក៏បានជួបប្រទះជនសង្ស័យមួយក្រុមមានគ្នា៤នាក់បានធ្វើសកម្មភាព គាស់ផ្ទះប្រជាពលរដ្ឋបាន សម្រេច ។ ភ្លាមៗនោះកម្លាំងសមត្ថកិច្ចក៏បានឃាត់ខ្លួន ជនសង្ស័យបានចំនួន២នាក់និង២នាក់ទៀតរត់គេចខ្លួនបាត់។
សម្ភារៈដកហូត : មានម៉ូតូផាស់អាប់មួយគ្រឿង (ម៉ាក បាចារ ពណ៌លឿង សេរីឆ្នាំ២០១៥ ពាក់ស្លាកលេខ ភ្នំពេញ ១GR ២៣៥១) ព្រមទាំងឧបករណ៍សម្ភារៈគាស់មួយចំនួនទៀត។
បច្ចុប្បន្ន ជនសង្ស័យទាំង២នាក់រួមនិងវត្ថុតាងត្រូវបានបញ្ជួន មក អធិការដ្ឋាននគរបាលខណ្ឌពោធិសែនជ័យ ដេីម្បីសាកសួរនិងកសាងសំណុំរឿងចាត់ការបន្តតាមនិតិវិធី។
ចំណែកបក្ខពួកជនសង្ស័យ២នាក់ទៀតសមត្ថកិច្ចកំពុងស្រាវជ្រាវតាមចាប់បន្ត ៕
