ឃ្លាំងលក់រថយន្តនិងឃ្លាំងលក់គ្រឿងបន្លាស់រថយន្តត្រូវអគ្គីភ័យឆាបឆេះបង្កការភ្ញាក់ផ្អើល

ភ្នំពេញ៖ អគ្គីភ័យបានឆាបឆេះយ៉ាងសន្ធោសន្ធៅនិងលេបត្របាក់ឃ្លាំងលក់រថយន្តស៊េរីទំនើបនិងឃ្លាំងលក់គ្រឿង បន្លាស់រថយន្តចំនួន៣ទីតាំងជាប់ៗគ្នានិងផ្ទះប្រជាពលរដ្ឋចំនួន២ខ្នងបន្ថែមទៀត ។
ហេតុការណ៍គ្រោះអគ្គីភ័យគួរឲ្យសោកស្ដាយនេះបានកើតឡើងកាលពីវេលាម៉ោង៣និង៣០នាទីទាបភ្លឺថ្ងៃទី១០ ខែឧសភា ឆ្នាំ២០១៨ នៅចំនុចឃ្លាំងលក់រថយន្តនិងលក់គ្រឿងបន្លាស់រថយន្តនៅតាមបណ្តោយផ្លូវលេខ២១៩ ស្ថិតក្នុងសង្កាត់ផ្សារដើមគ ខណ្ឌទួលគោក រាជធានីភ្នំពេញ ។

យោងតាមប្រភពព័ត៍មាននៅកន្លែងកើតហេតុបានឲ្យដឹងថា មុនពេលកើតហេតុគេបានឃើញអគ្គីភ័យឆាបឆេះឃ្លាំងលក់រថយន្តដែលនៅខាងត្បូងគេ ហើយបានបន្តឆាបឆេះឃ្លាំងដែលនៅជាប់គ្នាបន្តទៀតដែលជាឃ្លាំងលក់គ្រឿងបន្លាស់រថយន្តយ៉ាងសន្ធោសន្ធៅហើយបានបន្តទៅឃ្លាំងដែលជាប់គ្នានិងរាលដាលដល់ផ្ទះប្រជាពលរដ្ឋចំនួន២ខ្នងថែមទៀត ភ្លាមៗនោះក៏មានក្រុមរថយន្តពន្លត់អគ្គីភ័យជាច្រើនគ្រឿងចេញមកអន្តរាគមន៍ជួយបាញ់ពន្លត់ផងដែរ។តែទោះជាយ៉ាងអគ្គីភ័យនៅតែឆាបឆេះយ៉ាងសន្ធោសន្ធៅដដែលដោយសារតែមានប្រេងលាយលំនិងជ័រថែមទៀតផង នោះទើបមានការពិបាកនិងការគ្របគ្រង់ស្ថានការ។

រហូតមកដល់ម៉ោងជិត៧ថ្ងៃដដែលទើប អគ្គីភ័យបានរលត់ ទៅវិញក្រោយពីសំណាក់កម្លាំងអន្តរាគមន៍ពន្លត់អគ្គីភ័យបាន បាញ់ ពន្លត់យ៉ាងយកចិត្តទុកដាក់និងប្រើប្រាស់រថយន្តពន្លត់អគ្គីភ័យអស់ជាច្រើនគ្រឿង។ ប៉ុន្តែទំហំនៃការខូច ខាតយ៉ាងណានោះសមត្ថកិច្ចមិនទាន់វាយតំលៃបាននូវឡើយទេ ហើយចំពោះមូលហេតុនៃការឆាបឆេះនេះក៏មិនទាន់ដឹងនូវឡើយដែរ៕