ជនសង្ស័យ០៥នាក់ត្រូវបានសមត្ថកិច្ចក្រុងបាវិត ចាប់ឃាត់ខ្លួនបន្ទាប់ពីធ្វើសកម្មភាពឆក់កាបូប ពី ស្ត្រីម្នាក់

ស្វាយរៀង: កម្លាំងអធិការដ្ឋាននគរបាលក្រុងបាវិត ឃាត់ខ្លួនជនសង្ស័យបានចំនួន០៥នាក់ ដែលបានធ្វើសកម្មភាពឆក់កាបូប ជនរងគ្រោះ ដើម្បីកសាងសំណុំរឿងបញ្ជូនទៅសាលាដំបូងខេត្តស្វាយរៀង ៖ ហេតុការណ៍ឃាត់ខ្លួនជនសង្ស័យធ្វើឡើងកាលពីថ្ងៃទី២៤ ខែធ្នូ ឆ្នាំ២០២៣ បន្ទាប់ពីកម្លាំងប៉ុស្តិ៍នគរបាលរដ្ឋបាលបាវិត បានទទួល បណ្តឹងពីស្ត្រីរងគ្រោះម្នាក់ ជាជនជាតិវៀតណាម ដែលបានមកដាក់ពាក្យបណ្តឹងករណី (ឆក់កាបូប) ដែលកើតហេតុតាមបណ្តោយផ្លូវជាតិលេខ១ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង កាលពីថ្ងៃទី២៣ ខែធ្នូ ឆ្នាំ២០២៣។

សមត្ថកិច្ចឲ្យដឹងថា ក្រោយពីបានទទួលពាក្យបណ្តឹង ពីស្ត្រីរងគ្រោះកម្លាំងអធិការដ្ឋាននគរបាលក្រុងបាវិត សហការជាមួយកម្លាំងប៉ុស្តិ៍នគរបាលបាវិត បានធ្វើការស្រាវជ្រាវ រហូតកំណត់បានអត្តសញ្ញាណជនសង្ស័យ ឈានទៅដល់ការឃាត់ខ្លួនជនសង្ស័យបានចំនួន០៥នាក់ព្រមទាំងបានដកហូត ម៉ូតូរបស់ជនសង្ស័យចំនួន ០៥គ្រឿង, ទូរស័ព្ទដៃ ០១គ្រឿង កាបូប និងសម្ភារមួយចំនួនទៀត។

បច្ចុប្បន្ន ជនសង្ស័យទាំង០៥នាក់ត្រូវបានកសាងសំណុំរឿងបញ្ជូនទៅសាលាដំបូងខេត្តស្វាយរៀងចាត់ការតាមនីតិវិធីច្បាប់។