នគរបាលព្រហ្មទណ្ឌ បង្ក្រាបក្រុមចោរប្លន់នៅខេត្តសៀមរាប ចាប់ខ្លួនបាន២នាក់

សៀមរាប ៖ កម្លាំងនាយកដ្ឋាននគរបាលព្រហ្មទណ្ឌ ធ្វើការស្រាវជ្រាវបង្ក្រាបក្រុមចោរប្លន់នៅខេត្តសៀមរាប ចាប់ខ្លួនបានចំនួន២នាក់និងដកហូតវត្ថុតាង​ ដែលយកមកធ្វេីសកម្មភាពប្រព្រត្តិបទល្មេីសបានមួយចំនួន​ ៖ ហេតុការណ៍ចាប់ខ្លួនជនសង្ស័យនេះដែរធ្វើឡើង កាលពីថ្ងៃទី០៣ ខែមករា ឆ្នាំ២០២៤ នៅស្រុកគូលេន​និង ស្រុកសូនិគម​ ខេត្តសៀមរាប និងដកហូតបានវត្ថុតាង​ ដែលយកមកធ្វេីសកម្មភាពប្រព្រត្តិបទល្មេីសបានមួយចំនួន​។

ជនសង្ស័យដែលសមត្ថកិច្ចឃាត់ខ្លួនបានរួមមាន
ទី១៖ មានឈ្មោះ​ រ៉ង​ សារ៉ាត់​ ភេទប្រុស​ អាយុ​៣៣ឆ្នាំ​ ជនជាតិ​ខ្មែរ​ ឃាត់​ខ្លួនបាននៅចំណុច​ ភូមិថ្នលដាច់​ ឃុំដានរុណ​ ស្រុកសូនិគម​ ខេត្តសៀមរាប
ទី២៖ ឈ្មោះ​ ឈិន​ ភន ភេទប្រុស​ អាយុ​៣៨ឆ្នាំ​ ជនជាតិ​ខ្មែរ​ឃាត់ខ្លួនបាននៅចំណុចភូមិស្នាផ្អែក​ ឃុំ​ស្រយ៉ង​ ស្រុកគូលេន​ ខេត្តសៀមរាប និងដកហូតបានវត្ថុតាង​ ដែលយកមកធ្វេីសកម្មភាពប្រព្រត្តិបទល្មេីសបានមួយចំនួន​។
ក្រុមនេះតែងធ្វើសកម្មភាពយ៉ាងសកម្មនៅភូមិសាស្ដ្ររាជធានី-ខេត្ត។

សូមរំលឹកថា កាលពីថ្ងៃទី២២ខែធ្នូ ឆ្នាំ២០២៣ វេលាម៉ោង២១និង១៥នាទី នៅចំណុចផ្ទះរបស់ជនរងគ្រោះឈ្មោះ ឡិក វិច្ឆិកា ភេទស្រី អាយុ៣៣ឆ្នាំ មុខរបរលក់ដូរ ស្ថិតនៅភូមិត្រពាំងខ្ទះ(អូរប្រាំព្យាម) ឃុំស្វាយលើ ស្រុកស្វាយលើ ខខេត្តសៀមរាបក្រុមជនសង្ស័យចំនួន៣នាក់ បានធ្វើសកម្មភាពប្រើប្រាស់កាំបិតភ្ជង់ប្លន់យក ទ្រព្យសម្បត្តិរួចគេចខ្លួនដោយសុវត្ថិភាព។

ក្រោយពីមានហេតុការកើតឡើង ដោយអនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាន កម្លាំងជំនាញ​របស់នាយកដ្ឋាននគរបាលព្រហ្មទណ្ឌ បានដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន និងលោកវរសេនីយ៍ឯក ហែម បូណា អនុប្រធាននាយកដ្ឋាន ដឹកនាំសហការជា​មួយស្នងការដ្ឋាននគរបាលខេត្តសៀមរាប ស្នងការដ្ឋាននគរបាលខេត្តព្រះវិហារ បានស្រាវជ្រាវយ៉ាងយកចិត្តទុកដាក់ឈានដល់កំណត់បានអត្តសញ្ញាណមុខសញ្ញប្រព្រឹត្តខាងលើ និងទីតាំងលាក់របស់ជនសង្ស័យ។
លុះដល់ថ្ងៃទី០៣ ខែមករា ឆ្នាំ២០២៤ កម្លាំងជំនាញបានបន្តដឹកនាំសហការធ្វើការឃាត់ខ្លួនជនសង្ស័យបានចំនួន២នាក់តែម្ដង។

ក្រោយ​ពីសាកសួរជនសង្ស័យទាំងពីរ បានសារ ភាពដូចគ្នាថា​ កាលពីថ្ងៃទី២២ ខែធ្នូ ឆ្នាំ២០២៣ វេលាម៉ោង២១និង១៥នាទី ពួកខ្លួនដែលមានបក្ខចំនួន​៣នាក់​ ពិតជាបានធ្វើសកម្មភាពចូលផ្ទះប្រជាពលរដ្ឋ និងប្រដាប់ដោយកាំបិត (ដែលបានដកហូត ) ភ្ជង់ប្លន់យកទ្រព្យ​សម្បត្តិប្រជាពលរដ្ឋ នៅភូមិត្រពាំងខ្ទះ(អូរប្រាំព្យាម) ឃុំស្វាយលើ ស្រុកស្វាយលើ​ ខេត្តសៀមរាប ប្រាកដមែន។

បច្ចុប្បន្ន ជនសង្ស័យ ត្រូវបាននាយកដ្ឋាននគរបាលព្រហ្មទណ្ឌ ប្រគល់ឲ្យទៅស្នងការដ្ឋាននគរបាលខេត្តសៀម​រាប​ បន្តអនុវត្តនីតិវិធី និងស្វែងរកចាប់ខ្លួនមុខសញ្ញាជនសង្ស័យ​ឈ្មោះ​ ឈិន​ ភណ្ឌ​ ដែលរត់គេចខ្លួន៕