ឃាត់ខ្លួននារីម្នាក់ ដែលយកកាំបិតគំរាមសម្លាប់នារីរងគ្រោះក្នុងបន្ទប់ខុនដូ រួចថតវីដេអូបង្ហោះ
ភ្នំពេញ ៖ នារីជើងខ្លាំង ដែលបានប្រើប្រាស់អំពើហិង្សា យកកាំបិត និងបំណែកកែវស្រា គំរាមសម្លាប់នារីរងគ្រោះម្នាក់ រួចថតវីដេអូ បង្ហោះតាមបណ្ដាញសង្គម TikTok ពេលនេះ ត្រូវបានកម្លាំងនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលរាជធានីភ្នំពេញ ចាប់ខ្លួនបានហើយ បន្ទាប់ពីឃើញការផ្សព្វផ្សាយព័ត៌មាននៅលើបណ្ដាញសង្គម ពាក់ព័ន្ធករណីហិង្សាដោយចេតនា។
បើតាមប្រភពសមត្ថកិច្ច បានឲ្យដឹងថា មុនពេលកើតហេតុ នៅម៉ោង០៦និង៣០នាទីព្រឹកថ្ងៃទី១១ សីហា ២០២៤ មានបុរសជនជាតិស្បែកខ្មៅម្នាក់ បានឆាត(សារ)ហៅនារីរងគ្រោះម្នាក់ អោយមកលេងនៅខុនដូ Parkland ខ្លួន រួចហើយអោយនាងចូលក្នុងបន្ទប់ខុនដូរបស់គាត់ ។ បន្ទាប់មក បុរសជនជាតិស្បែកខ្មៅរូបនោះ បានយកស្រាបៀរ មកផឹកជាមួយនារីរងគ្រោះ និយាយគ្នាលេងធម្មតា ។ រហូតដល់វេលាម៉ោង១០ព្រឹកថ្ងៃដដែល ស្រាប់តែឮសូរស្នូរគោះទ្វារបន្ទប់ខុនដូ ។ នៅពេលនោះ បុរសជនជាតិស្បែកខ្មៅ បានប្រាប់នារីរងគ្រោះ ថា ឲ្យរកកន្លែងលាក់ខ្លួនសិន ព្រោះនារីជាសង្សាររបស់គាត់បានមកដល់ហើយ ។
ប្រភពដដែល បានអោយដឹងទៀតថា នៅពេល បើកទ្វារបន្ទប់ខុនដូ នារីជាសង្សារជនជាតិស្បែកខ្មៅរូបនោះ បានដើររកឃើញនារីរងគ្រោះ ពេលនោះ នាងបានស្ទុះទៅបោចសក់នារីរងគ្រោះ ហើយយកកាំបិតប៉័ងតោ និងបំណែកកែវស្រា គំរាមសម្លាប់ រួចថតវីដេអូ (ទុកបង្ហោះលើបណ្ដាញសង្គម TikTok) ហើយអូសនារីរងគ្រោះចូលបន្ទប់ទឹកប្រើហិង្សា ប៉ុន្តែសំណាងល្អ មានមនុស្ស២នាក់ទៀត (បុរសនិងស្ត្រី) មកជួយទាន់ ទើបនារីរងគ្រោះរួចខ្លួន ។
សូមជម្រាបថា បន្ទាប់ពីឃើញការបង្ហោះផ្សព្វផ្សាយព័ត៌មាននៅលើបណ្ដាញសង្គម ពាក់ព័ន្ធករណីហិង្សារួចមក លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឱ្យកម្លាំងជំនាញ ធ្វើការស្រាវជ្រាវករណីនេះ ផងដែរ ។
ដោយអនុវត្តតាមបទបញ្ជារបស់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កាលពីថ្ងៃទី១០ ខែកញ្ញា ឆ្នាំ២០២៤ កម្លាំងការិយាល័យនគរបាលព្រហ្មទណ្ឌកំរិតស្រាល សហការជាមួយកម្លាំងអធិការដ្ឋាននគរបាលខណ្ឌឫស្សីកែវ បានធ្វើការស្រាវជ្រាវឃាត់ខ្លួនជនសង្ស័យឈ្មោះ លីម សុខលាប ភេទស្រី នៅចំណុចមុខផ្ទះលេខ ៣៦B ផ្លូវ៩៩ សង្កាត់បឹងត្របែក ខណ្ឌចំការមន ពាក់ព័ន្ធករណីហិង្សាដោយចេតនា ។
បច្ចុប្បន្នជនសង្ស័យខាងលើ សមត្ថកិច្ចកំពុងសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕
