រថយន្តដឹកទឹកកកបើកបុកម៉ូតូពីក្រោពេញទំហឹងស្លាប់បុរសម្នាក់និងប្រពន្ធរងរបួសធ្ងន់
ភ្នំពេញ៖ រថយន្តដឹកទឹកកកបើកលឿនមិនប្រុងប្រយត្ន័ជ្រុលទៅបុកម៉ូតូវេវ ពីក្រោយបណ្ដាលឲ្យប្ដីស្លាប់ភ្លាមៗនៅកន្លែង ចំណែកប្រពន្ធរងរបួសធ្ងន់ ៖ ហេតុការណ៍គ្រោះថ្នាក់ចរាចរណ៍គួរឲ្យរន្ធត់នេះបានកើតឡើងកាលពីវេលាម៉ោង ៦និន១៥នាទីព្រឹកថ្ងៃទី២៤ខែវិច្ឆិកាឆ្នាំ២០១៨ នៅតាមបណ្ដោយផ្លូវវេងស្រេង កែងនិងផ្លូវ៣៧១ សូឡា ស្ថិតក្នុងភូមិដំណាក់ធំ៥ សង្កាត់ស្ទឹងមានជ័យ៣ ខណ្ឌមានជ័យ។
សពបុរសរងគ្រោះមានឈ្មោះ ប្រាក់ សំណាង អាយុ៤៨ឆ្នាំមុខរបរសន្តិសុខយាមនៅមន្ទីរពេទ្យគន្ធបុប្ផាស្នាក់នៅភូមិប្រការសង្កាត់ព្រៃសខណ្ឌដង្កោ ។ ចំណែកប្រពន្ធរងរបួសធ្ងន់មិនទាន់ស្គាល់អត្តសញ្ញាណ នៅឡើយទេ ។
ដោយឡែកអ្នកបើករថយន្ដបើតាមអត្តសញ្ញាណប័ណ្ណមានឈ្មោះ ឆើម ឆេងឡុង យុអា២៤ឆ្នាំមុខរបរបើករថយន្ត ស្នាក់នៅភូមិភ្នាតសង្កាត់ស្ទឹងមានជ័យ២ ខណ្ឌមានជ័យ និងមានស្រុកកំណើតនៅភូមិព្រែកតាគង់ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល រត់គេចខ្លួនបាត់ ។
បើតាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុគេឃើញជនរងគ្រោះទាំង២នាក់ប្ដីប្រពន្ធជិះម៉ូតូមួយគ្រឿងម៉ាកវេវ ពណ៍ក្រហមលាយខ្មៅ ពាក់ស្លាកលេខ ភ្នំពេញ 1AB-1644 ជិះឌុបគ្នាតាមបណ្ដោយផ្លូវវេងស្រេងទិសដៅពីលិចទៅកើត ខណៈមកដល់ចំណុចកើតជនរងគ្រោះបើកភ្លើងសុីញ៉ូបំរុងបត់ឆ្វេង តែមិនទាន់បានបត់ផង ស្រាប់តែមានរថយន្តដឹកទឹកកក ម៉ាកហុីយ៉ាន់ដាយពណ៍ខៀវ ពាក់ស្លាកលេខ ភ្នំពេញ 2M- 0417 បើកយ៉ាងលឿងទិសដៅស្របទិសគ្នាក៏ជ្រុលទៅបុកម៉ូតូពីរក្រោយពេញទំហឹងនិងកិនជនរងគ្រោះជាប្ដីបណ្ដាលឲ្យស្លាប់ភ្លាមៗនៅនិងកន្លែងកើតហេតុ ចំណែកប្រពន្ធរបួសធ្ងន់ធ្ងរត្រូវបានរថយន្តសាមុយដឹកទៅសង្គ្រោះបន្ទាន់នៅមន្ទីរពេទ្យកុសុមះហៅពេទ្យលោកសង្ឃ ភ្លាមៗនោះដែររថយន្ដបង្ករបានបើកយកទៅទុកនៅកន្លែងសិវប្បកម្មរផលិតទឹកកកនៅភូមិភ្នាតសង្កាត់ស្ទឹងមានជ័យ២ ខណ្ឌមានជ័យ ហើយអ្នកបើកបររត់គេចខ្លួនបាត់ស្រមោល។
ក្រោយពេលកើតហេតុសមត្ថកិច្ចមូលដ្ឋានបានសហការជាមួយសមត្ថកិច្ចជំនាញចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោក នៃស្នងការនគរបាលរាជធានីភ្នំពេញរងចាំដោះស្រាយនៅពេលក្រោយ ។ ចំណែកសពត្រូវបានប្រគល់អោយក្រុមគ្រួសារដឹកយកទៅធ្វើបុណ្យតាមប្រពៃណី ៕
