រថយន្តឈើបើកបុកផ្តាច់ជីវិតបុរសចំណាស់ម្នាក់ស្លាប់យ៉ាងអាណោចអធម៌

កំពង់ធំ៖​ រថយន្តសាំយ៉ុង​ដឹកឈើបើកលឿនមិនប្រយត្ន័ជ្រុល​ទៅបុកម៉ូតូហុងដាឌ្រីម​ ពីក្រោយពេញទំហឹង​ បណ្ដាលឲ្យបុរសចំណាស់​ម្នាក់បានស្លាប់បាត់បង់ជីវិតយ៉ាងអាណោចអធម៌និងស្ត្រីជាប្រពន្ធរងរបួសធ្ងន់
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពី​វេលាម៉ោង០៧និង៣០នាទីព្រឹកថ្ងៃទី៣០ខែវិច្ឆិកាឆ្នាំ២០១៨​នៅចំណុច​ អូរដៃជ្រៃ តំបន់អូរកំពប់អំបិល ភូមិសង្គ្រោះ ឃុំបឹងល្វា ស្រុកសន្ទុក ខេត្តកំពង់ធំ ។

សមត្ថកិច្ចបានឲ្យដឹងថា​ជនរងគ្រោះដែល(ស្លាប់)មាន​ឈ្មោះ​ សៀន ឈិន​ ភេទប្រុ​ស​អាយុ៦២ឆ្នាំ ចំណែកប្រពន្ធដែលជិះខាងក្រោយមានឈ្មោះ​ ឃ្លោក ជឹង​ ភេទស្រីអាយុ៥៨ឆ្នាំរងរបួស​ធ្ងន់ត្រូវបានដឹកយកទៅសង្គ្រោះបន្ទាន់នៅមន្ទីរ​ពេទ្យ​ភ្លាមៗ​ ។ អ្នក​ទាំងពីររស់នៅភូមិត្បែង ឃុំបឹងល្វា ស្រុកសន្ទុក ខេត្តកំពងធំ។​ ដោយឡែកអ្នកបេីកបររថយន្តដឹកឈេីត្រូវបានគេស្គាល់ឈ្មោះ រី ថន រស់នៅភូមិបឹង ឃុំបឹង ស្រុកបារាយណ៏ កំពង់ធំ​ ដែលជាអ្នករកសុីដឹកជញ្ជូនឈេី ដុះស្លែ យូរមកហេីយ បានរត់គេចខ្លួន បាត់ស្រមោល​ ។

បើតាមប្រភពព័ត៌មាននៅកន្លែងកើតហេតុបានឲ្យដឹងថា​ មុន​ពេលកេីតហេតុគេបានឃេីញរថយន្ត​ បង្កម៉ាកសាំយ៉ុង​ ពណ៌​លឿងគ្មានស្លាកលេខ​ ដឹកឈើពេញរថយន្ត​ បេីកបរដោយបុរស​ម្នាក់ក្នុងល្បឿនយ៉ាងលឿនទិសដៅពីជើងទៅត្បូង​ ស្របទិសគ្នាជាមួយម៉ូតូជនរងគ្រោះ​ ខណៈមកដល់ចំណុចកើតហេតុ​ ស្រាប់តែរថយន្តបានរេចង្កូតជ្រុលទៅពីក្រោយ​ពេញទំហឹងបណ្ដាលឲ្យ​ដួលម៉ូតូនិងខ្ទាតបុរសរងគ្រោះបោកក្បាលស្លាប់គួរអោយរន្ធត់​ និងប្រពន្ធដែលរួមដំណើរជាមួយ​របួសធ្ងន់​ ។ ចំណែកម៉ូតូម៉ាកហុងដាឌ្រីម​ ០៥ពាក់ស្លាកលេខ​ភ្នំពេញ1AM-8758 រងការខូចខាតយ៉ាងដំណំ​ ។ ចំណែក​ អ្នកបើកបរបន្ទប់ពីបង្កគ្រោះថ្នាក់ភ្លាមៗបានចុះរត់គេចខ្លួនបាត់​ដោយសុវត្ថិភាព​ ។

ក្រោយពេលកើតហេតុសមត្ថកិច្ចមូលដ្ឋានបានទៅដល់កន្លែងកើតហេតុធ្វើការវាស់វែងយករថយន្តបង្កនិងម៉ូតូជនរង​គ្រោះទៅរក្សាទុកនៅអធិការស្រុក​ សន្ទុករងចាំដោះស្រាយ​តាមច្បាប់​ ។​ ចំណែកសពជនរងគ្រោះសមត្ថកិច្ចធ្វើកំណត់​ហេតុប្រគល់អោយគ្រុមគ្រួសារយកទៅធ្វើបុណ្យតាមប្រពៃណី​ ៕