អាសូរណាស់!បុរសម្នាក់ត្រូវរថយន្តមិនចាំម៉ាកបើកគៀរនិងកិនស្លាប់គួរឲ្យសង្វេក

ភ្នំពេញ៖ បុរស២នាក់ជិះម៉ូតូឌុបគ្នាត្រូវរថយន្តមិនស្គាល់ម៉ាកបើកគៀរនិងកិនស្លាប់ម្នាក់យ៉ាងអាណោចអធម៌ ចំណែកម្នាក់ទៀតរងរបួសស្រាល

គ្រោះថ្នាក់ចរាចរណ៍នេះបានកើតឡើងកាលពីវេលា ម៉ោងម៉ោង១១និង២០នាទីយប់ថ្ងៃទី០២ខែកុម្ភៈឆ្នាំ២០១៩ នៅតាមបណ្ដោយផ្លូវវ៉េងស្រេង ត្រង់ចំនុចស្ដុបលូប្រាំ ភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ ។

សពជនរងគ្រោះមានឈ្មោះ ឡាង ភេទប្រុស អាយុ ២៣ឆ្នាំ មុខរបរជាងដែក ស្នាក់នៅម្ដុំទួលពង្រ ខណ្ឌពោធិ៍សែនជ័យ និងមានស្រុកកំណើត ភូមិគ្រាំងដៃ ឃុំធ្លក ស្រុកទ្រាំង ខេត្តតាកែវ។

បើតាមសម្ដីជនរងគ្រោះដែលជាអ្នកបើកម៉ូតូនិងរបួស ស្រាលបានឲ្យដឹងថា មុនពេលកើតហេតុ ពួកគេទាំង ២នាក់បានផឹកសុីនៅម្ដុំទួលពង្រ រួចនឹកចង់ទៅលេង នៅកោះពេជ្រក៏បានជិះម៉ូតូមួយគ្រឿងម៉ាកហុងដាឌ្រីមសង់ស៊េរី២០១៥ពណ៌ខ្មៅ ពាក់ស្លាកភ្នំពេញ 1M-0483 ដោយឌុបគ្នាតាមបណ្ដោយផ្លូវវេងស្រេង ទិសដៅពីលិចទៅកើត លុះមកដល់ចំនុចស្តុបលូប្រាំដែលជាកន្លែងកើតហេតុ ក៏បានបត់ម៉ូតូត្រឡប់ក្រោយ វិញព្រោះខ្លាចព្រឹកឡើងធ្វើការមិនកើត ខណៈដែល បត់ទើបបាន២០ទៅ៣០ម៉ែត្រស្រាប់តែមានរថយន្តធន់ ធំមួយគ្រឿងមិនចាំម៉ាកបានបើកមកគៀរបណ្ដាលឲ្យដួលនិងធ្លាក់អ្នកជិះខាងក្រោយចូលក្រោមកង់រថយន្តក៏កិនស្លាប់ភ្លាមៗ យ៉ាងអាណោចអធម៌និង រូបគេដែលជាអ្នកបើកម៉ូតូរបួសស្រាល ។ ចំណែក រថយន្តបន្ទាប់ពីបង្កគ្រោះថ្នាក់រួចបានបន្ថែមល្បឿនបើកគេចបាត់ ស្រមោល ។

ក្រោយពេលហេតុជនរងគ្រោះដែលរងរបួសបាន បញ្ជូនទៅមន្ទីរពេទ្យ ចំណែកសពជនរងគ្រោះសមត្ថកិច្ចធ្វើកំណត់ហេតុនិងទំនាក់ទំនងទៅក្រុមគ្រួសារឲ្យមកទទួលយកទៅធ្វើបុណ្យតាមប្រពៃណីនៅស្រុកកំណើត ដោយឡែកម៉ូតូសមត្ថកិច្ចយកទៅរក្សាទុក នៅប៉ុស្តិ៍នគរបាលស្ទឹងមានជ័យ៣ រងចាំយកឯកសារគ្រប់គ្រាន់មកផ្ទៀងផ្ទាល់ទើបប្រគល់អោយវិញ៕