ជិះម៉ូតូលឿនមិនប្រយត្ន័បុកឃឿនទ្រូងផ្លូវ បោកក្បាលស្លាប់ម្នាក់និងម្នាក់ទៀតរបួសបែកមុខ

ភ្នំពេញ៖ យុវជន២នាក់ជិះម៉ូតូឌុបគ្នាបើកលឿនដូចហោះមិន​ប្រយត្ន័ខណៈដល់ផ្លូវកោងចាប់ហ្វ្រាំងមិនទាន់ជ្រុលទៅបុក​ឃឿនទ្រូងផ្លូវបណ្ដាលឲ្យយុវជនម្នាក់បានបោកក្បាលនិងថ្នល់ស្លាប់ភ្លាមៗនៅក្នុងថ្លុកឈាមយ៉ាងអាណោចអធម៌ ចំណែកអ្នករួមដំណើរម្នាក់ទៀតរងរបួសបែកមុខមាត់
គ្រោះថ្នាក់ចរាចរណ៍ដ៏រន្ធត់នេះ បានបង្កការភ្ញាក់ផ្អើលកាលពីវេលាម៉ោង១២ និង១០នាទីរំលងអាធ្រាត ឈានចូលថ្ងៃទី៦ខែកុម្ភៈ ឆ្នាំ២០១៩ នៅតាមបណ្ដោយផ្លូវវេងស្រេង ទល់មុខនិងបន្ទាយកងរាជអាវុធហត្ថរាជធានីភ្នំពេញ សង្កាត់​ស្ទឹងមានជ័យ១ ខណ្ឌមានជ័យ រាជធានីភ្នំពេញ​ ។

សពជនរងគ្រោះមានឈ្មោះ អុិន ឃាន់ ភេទប្រុស អាយុ២៣ ឆ្នាំ មុខរបរបុគ្គលិកមជ្ឈមណ្ឌលក្លឹបកំសាន្ដអាត់បី មានស្រុកកំណើត ភូមិចំបក់ជ្រុំ ឃុំប្រាសាទ ស្រុកសន្ទុក ខេត្តកំពង់ធំ។

បើតាមសម្ដីជនរងគ្រោះដែលរួមដំណើរជាមួយ និងរងរបួសបែកមុខមាត់បានប្រាប់ឲ្យដឹងថា មុនពេលកើតហេតុ ពួកគេ​ទាំងពីរនាក់បានចេញពីកន្លែងធ្វើការនិងជិះម៉ូតូម៉ាកzoomer ពណ៌ទឹកក្រូចលាយសរ ពាក់ស្លាកលេខ កណ្ដាល 1W-2342 នាំគ្នាទៅហូបអីនៅឯលូប្រាំ ខណះមកដល់ចំណុចកើតហេតុ ដោយជនរងគ្រោះជិះម៉ូតូលឿនពេកចាប់ហ្រ្វាំងមិនទាន់ក៏បានរេចង្កូតបុកនិងឃឿនផ្លូវអូសម៉ូតូ​ប្រហែល២០ម៉ែត្រ បណ្ដាលឲ្យជនរងគ្រោះអ្នកឌុបបោកក្បាលនិងថ្នល់ស្លាប់ក្នុងថ្លុកឈាមយ៉ាងអាណោចអធម៌ រីឯរូប​គេជិះខាងក្រោយរងរបួសបែកមុខមាត់ ត្រូវបានក្រុមរថយន្ដសង្គ្រោះបន្ទាន់មកលាងរបួសឲ្យ។

ក្រោយពេលកេីតហេតុ សម្ថកិច្ចមូលដ្ឋានបានចុះមកដល់ចំណុចកេីតហេតុ និងធ្វេីការវាស់វែងយកម៉ូតូទៅរក្សាទុកនៅ​ប៉ុស្ដិ៍នគរបាលស្ទឹងមានជ័យ១ រង់ចាំសាច់ញាតិយកឯកសារពាក់ព័ន្ធនិងប្រគល់ឲ្យវិញ។ ចំណែកសពជនរងគ្រោះ ត្រូវបាន​សមត្ថកិច្ចធ្វើកំណត់ហេតុប្រគល់ឲ្យទៅក្រុមគ្រួសារយក​ទៅធ្វេីបុណ្យតាមប្រពៃណី៕