រថយន្ដក្រឡុកស៊ីម៉ងតិ៍បុករះម៉ូតូនៅមុខវិទ្យាល័យបឹងត្របែកស្លាប់ម្នាក់ក្រោយបញ្ជួនទៅមន្ទីរពេទ្យនិង៤នាក់ទៀតរបួសធ្ងន់ស្រាល
ភ្នំពេញ៖ រថយន្ដក្រឡុកស៊ីម៉ងតិ៍ដាច់ហ្វាំងបុករះម៉ូតូ៦គ្រឿង
រ៉ឺម៉កកង់បី២គ្រឿងបណ្ដាលឲ្យមនុស្សប្រុសស្រីរងរបួសធ្ងន់ស្រាល៥នាក់និងបានស្លាប់ម្នាក់ក្រោយពេលបញ្ជួនដល់មន្ទីរពេទ្យ៖ គ្រោះថ្នាក់ចរាចរណ៍ដ៏រន្ធត់នេះបានបង្កការភ្ញាក់ផ្អើលកាលពីវេលាម៉ោង០៨និង០០នាទីព្រឹកថ្ងៃទី២០ខែកុម្ភៈឆ្នាំ២០១៩ នៅចំណុចមុខសាលាវិទ្យាល័យបឹងត្របែក តាមបណ្ដោយផ្លូវព្រះមុន្នីវង្ស សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ជនរងគ្រោះដែលរបួសធ្ងន់រួចបានស្លាប់នៅមន្ទីរពេទ្យមានឈ្មោះ សុខ តែល អាយុ៤០ឆ្នាំមុខរបរ គ្រូបង្រៀនមុខវិជ្ជាភាសាខ្មែរ និងអ្នករងរបួស៤នាក់ទៀតមិនត្រូវបានស្គាល់អត្ដសញ្ញាណនោះទេ ។
ចំណែកអ្នកបើករថយន្ដមានឈ្មោះ ព្រុំ ប៊ុនណាត អាយុ៤៨ ឆ្នាំមុខរបរ បើកបររថយន្ដ មានទីលំនៅក្នុងក្រុមហ៊ុនCPAC ភូមិម័ល សង្កាត់ដង្កោ ខណ្ឌដង្កោ ស្រុកកំណើត ភូមិអំពិលលើ ឃុំអំពិលលើ ស្រុកកំពុងសៀម ខេត្ដកំពុងចាម។
យោងតាមប្រភពព័ត៌មាននៅកន្លែងកើតហេតុបានប្រាប់ឲ្យដឹងថា មុនពេលកើតហេតុគេឃើញរថយន្ដក្រឡុកស៊ីម៉ងតិ៍មួយគ្រឿងបើកតាមបណ្ដោយផ្លូវព្រះមុន្នីវង្ស ទិសដៅពីត្បូងជើងខណៈមកដល់ចំណុចមុខសាលាវិទ្យាល័យបឹងត្របែកគ្រាដែលម៉ូតូជនរងគ្រោះកំពុងឈប់ស្ដុបក៏ត្រូវរថយន្ដបុករះពីក្រោយពេញទំហឹងបណ្ដាលឲ្យម៉ូតូចំនួន៦គ្រឿង និង រ៉ឺម៉កកង់បី២គ្រឿងរងការខូចខាតនិងមនុស្សប្រុសស្រីចំនួន៥នាក់រងរបួសធ្ងន់ស្រាល បន្ទាប់មកបានស្លាប់ម្នាក់នៅមន្ទីរពេទ្យ ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់និងបានឃាត់ខ្លួនតៃកុងរថយន្ដយកមកកាន់អធិការដ្ឋាននគរបាលខណ្ឌចំការមន រួចទាក់ទងទៅរថយន្ដសាម៉ុយឲ្យមកទទួលយកនាក់របួសទៅសង្គ្រោះភ្លាមៗ និងទាក់ទងទៅសមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញចុះមកធ្វើការវាស់វែងយករថយន្ដនិងម៉ូតូទៅរក្សាទុករងចាំដោះស្រាយគ្នាពេលក្រោយ ៕
