ឆេះផ្ទះសិប្បកម្មឈើផ្អើលសមត្ថកិច្ចនិងកម្លាំងអន្តរាគមន៍ចេញរថយន្តពន្លត់អគ្គីភ័យផ្អើលពលរដ្ឋមួយចំហៀងក្រុង
ភ្នំពេញ ៖ ផ្ទះបើកសិប្បកម្មកែច្នៃឈើ មួយកន្លែងត្រូវបាន អគ្គីភ័យឆាបឆេះសន្ធោសន្ធៅ បង្កការភ្ញាក់ផ្អើលកាលពីវេលាម៉ោង០៥និង៣០នាទីល្ងាចថ្ងៃទី២២ខែកុម្ភៈឆ្នាំ២០១៩នៅចំនុច ផ្ទះសិប្បកម្មកែច្នៃឈើ យុីហោ (សុខ ម៉េងលី) នៅតាមបណ្ដោយផ្លូវ២០០៤ ភូមិត្រពាំងល្វា សង្កាត់កាកាប១ ខណ្ឌពោធិសែនជ័យ រាជធានីភ្នំពេញ ។
បើតាមប្រភពព័ត៌មានពីប្រជាពលរដ្ឋដែលនៅក្បែរ កន្លែងកើតហេតុបានឲ្យដឹងថា មុនពេលកើតហេតុគេឃើញមានក្រុមជាងផ្សារដែកធ្វើដំបូលផ្ទះមួយល្វែងផ្សេងឲ្យម្ចាស់សិប្បកម្មខាងលើដែលជាប់គ្នានិងល្វែងដាក់គ្រឿងឈើ ។ ស្រាប់តែមានផ្សែងហុយចេញពីគំនរឈើបង្កជាអណ្ដាតភ្លើងឆេះឡើងសន្ធោសន្ធៅ ភ្លាមៗនោះប្រជាពលរដ្ឋនិងម្ចាស់ផ្ទះបានទំនាក់ទំនងទៅសមត្ថកិច្ចមូលដ្ឋានអោយទាក់ទងហៅរថយន្តពន្លត់អគ្គីភ័យ និងកម្លាំងជំនាញ ចេញមកអន្តរាគមន៍ជួយបាញ់ពន្លត់ជាច្រើនគ្រឿង រហូតដល់ម៉ោង០៦ល្ងាចថ្ងៃដដែលទើបរលត់ ។
ដោយឡែកទំហំនៃការខូចខាតគេមិនទាន់ដឹងច្បាស់នៅឡើយនោះទេ ហើយជុំវិញកណីអគ្គីភ័យនេះសមត្ថកិច្ចនិងប្រជាពលរដ្ឋបានដាក់ការសង្ស័យថា អាចបណ្ដាលមកពីការធ្វេសប្រហេសរបស់ជាងផ្សារដែកខណៈដែលកំពុងផ្សារធ្វើធ្លាក់កម្ទេចភ្លើងលើគំនរឈើបណ្ដាលឲ្យឆេះតែម្ដង តែទោះជាយ៉ាងណាសមត្ថកិច្ចនៅតែបន្តស្រាវជ្រាវរកមូលហេតុពិត ៕ 
