កម្លាំងសមត្ថកិច្ចឆ្មក់ចូលឆែកឆេបង្ក្រាបទីតាំងក្លឹបកំសាន្តRock ឃាត់ខ្លួនក្រុមអ្នកប្រើប្រាសគ្រឿងញៀនជាច្រើនរយនាក់តែមិនឲ្យអ្នកការសែតចូលថតយកព័ត៌មាន
ភ្នំពេញ៖ មានហេតុមួយបានកើតឡើងកាលពីវេលាម៉ោង១រំលងអាធ្រាត្រ ឈានចូលថ្ងៃទី២៣ខែកុម្ភៈ ឆ្នាំ២០១៩ ដោយឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញបានដឹកនាំកម្លាំងសមត្ថកិច្ចដោយផ្ទាល់ជាច្រើននាក់ឆ្មក់ចូលឆែកឆេរទីតាំងក្នុងក្លឹបកំសាន្តRock នៅតាមបណ្ដោយផ្លូវព្រះមុន្នីវង្ស ក្នុងសង្កាត់ទន្លេបាសាក់ ខណ្ឌចំការមន ដោយកម្លាំងសមត្ថកិច្ចឃាត់បានមនុស្សរាប់រយនាក់ និងដកហូតថ្នាំញៀនជាច្រើនប្រភេទ មួយចំនួនធំ ។
នៅក្នុងប្រតិបត្តិការណ៍របស់កម្លាំងស្នងការនគរបាល រាជធានីភ្នំពេញខាងលើ មិនត្រូវបានអនុញ្ញាតិអោយក្រុមអ្នកសារព័ត៌មានជាច្រើននាក់ចូលទៅក្នុងទីតាំងក្លឹបកំសាន្តRockដើម្បីថតផ្ដិតយករូបភាពមនុស្សដែលត្រូវឃាត់ខ្លួន ក៏ដូចជាវត្ថុតាង ជាប្រភេទថ្នាំញៀន បាននោះទេ។ តែទោះជាយ៉ាងណា គេសង្កេតឃើញមានរថយន្តហុីយ៉ាន់ដាយ ប្រភេទ៥តោនចំនួន២គ្រឿងបានចូលទៅក្នុងបរិវេនក្លឹបកំសាន្តRock ហើយមានកម្លាំងសមត្ថកិច្ចចាប់មនុស្សបញ្ចូលក្នុងរថយន្តហុីយ៉ាន់ដាយ ជាច្រើននាក់ផងដែរ ។ ក្នុងនោះ ក៏មានសមត្ថកិច្ចបានបង្ហើបរូបភាព ថ្នាំញៀនជាច្រើនប្រភេទ និងជាច្រើនកញ្ចប់ផងដែរ ។
ក្រោយពីឃាត់មនុស្សជាច្រើនរយនាក់ ក៏ដូចជាវត្ថុតាងទាំងប៉ុន្មានរួចមក កម្លាំងសមត្ថកិច្ចបានបញ្ចូនទៅស្នងការនគរបាលរាជធានីភ្នំពេញ ដើម្បីអនុវត្តបន្តតាមនីតិវិធី ៕
