យុវជន២នាក់ជិះម៉ូតូលឿនវ៉ាជែងជ្រុលបុករថយន្តយីឌុកស្លាប់ទាំង២នាក់
ភ្នំពេញ៖ យុវជនម្នាក់បានស្លាប់បាត់បង់ជីវិតយ៉ាងអាណោចអាធម៌នៅកន្លែងកើតហេតុនឹងម្នាក់ទៀតស្លាប់ពេលបញ្ជូនទៅសង្គ្រោះនៅមន្ទីរពេទ្យ ខណៈដែលយុវជនរងគ្រោះទាំង២នាក់ជិះម៉ូតូឌុបគ្នាបើកលឿនវ៉ាជែងមិនប្រយត្ន័ជ្រុលទៅបុកជាមួយរថយន្តចំពីមុខ
គ្រោះថ្នាក់ចរាចរណ៍គួរឲ្យរន្ធត់នេះកើតឡើងកាលពីវេលាម៉ោង៧ព្រឹកថ្ងៃទី០៤ ខែ មីនា ឆ្នាំ ២០១៩ តាមបណ្តោយផ្លូវជាតិលេខ៤ ក្នុងសង្កាត់ចោមចៅទី៣ ខណ្ឌពោធិសែនជ័យ រាជធានីភ្នំពេញ ។
បើតាមប្រភពពីប្រជាពលរដ្ឋដែលឃើញហេតុការណ៍បានអោយដឹងថាដំបូងឡើយយុវជន២នាក់បានជិះម៉ូតមួយគ្រឿងម៉ាកសេ១២៥ ពណ៌ខ្មៅ ធ្វើដំណើរតាមបណ្តោយផ្លូវជាតិលេខ៤ ទិសដៅពិលិចទៅកើតបើកបរក្នុងល្បឿនយ៉ាងលឿនវ៉ាម៉ូតូមួយគ្រឿងផ្សេងទៀតក៏ជ្រុលទៅបុកជាមួយរថយន្តយីឌុក ម៉ាកហុីយ៉ានដាយ មួយគ្រឿងដែលធ្វើដំណើរបញ្ច្រាសទិសគ្នាពេញទំហឹងបណ្តាលអោយយុវជនម្នាក់ស្លាប់បាត់បង់ជីវិតនៅនឹងកន្លែងកើតហេតុចំណែកយុវជនម្នាក់ទៀតរងរបួសធ្ងន់ ហើយបានស្លាប់ពេលរថយន្តសង្គ្រោះដឹកយកទៅកាន់មន្ទីពេទ្យ ឯម៉ូតូរងការខូចខាត។
ក្រោយកើតហេតុសមត្ថកិច្ចមូលដ្ឋានបានសហការជាមួយនគរបាលចរាចរជំនាញចុះវាស់វែងអូសយកម៉ូតូនឹងរថយន្តទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយនាពេលក្រោយ ។ ចំណែកសពជនរងគ្រោះទាំង២នាក់សមត្ថកិច្ចធ្វើកំណត់ហេតុប្រគល់យកក្រុមគ្រួសារដឹកយកទៅធ្វើបុណ្យតាមប្រពៃណី ៕
