បុរសម្នាក់ត្រូវរថយន្ដមិនស្គាល់ម៉ាក២គ្រឿងគៀរឲ្យដួលរួចកិនស្លាប់ក្នុងថ្លុងឈាមគួរឲ្យរន្ធត់

ភ្នំពេញ៖ រថយន្ដមិនស្គាល់ម៉ាក២គ្រឿងបានបើកគៀរបុរស​ម្នាក់កំពុងតែជិះម៉ូតូបណ្ដាលឲ្យដួល និងកិនអូសដាច់សាច់ ស្លាប់ភ្លាមៗយ៉ាងអាណោចអធម៌ ។
គ្រោះថ្នាក់ដ៏រន្ធត់នេះបានបង្កការភ្ញាក់ផ្អើលកាលពីវរលា​ម៉ោង​២និង ០០នាទីរំលងអាធ្រាតឈានចូលថ្ងៃទី០៦ ខែមិនា ឆ្នាំ២០១៩ នៅតាមបណ្ដោយផ្លូវជាតិលេខ៥ ត្រង់ចំណុចមុខ ខារ៉ាអូខេដាយមិនសោន ក្នុងសង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ។

សពជនគ្រោះមានឈ្មោះ នឹម សុផល ភេទប្រុស អាយុ៤៨​ឆ្នាំ ស្នាក់នៅផ្ទះជួល ម្ដុំផ្សារព្រែកព្នៅ ក្នុងសង្កាត់ព្រែកព្នៅ ខណ្ឌព្រែកព្នៅ ។

បើយោងតាមប្រភពព័ត៌មាននៅកន្លែងកើតហេតុបានឲ្យដឹងថា មុន​កើតហេតុគេឃើញបុរសម្នាក់បានជិះម៉ូតូម៉ាក​Zoomber x ពណ៌សរ ពាក់ស្លាកលេខភ្នំពេញ​1FW-4915 ធ្វើដំណើរ តាមបណ្ដោយផ្លូវជាតិលេខ៥ទិសដៅពីត្បូងទៅជើងក្នុងល្បឿនមធ្យម លុះមកដល់និងចំណុចកើតហេតុក៏​មាន​រថយន្ដ២គ្រឿងដែលមិនស្គាល់ម៉ាកបានធ្វើដំណើរពីក្រោយស្របទិសគ្នាក្នុងល្បឿលឿន ព្រមទាំងបើកគៀរ
បុ​រសរងគ្រោះកំពុងជិះម៉ូតូបណ្ដាលឲ្យដួល និងកិនអូសជិត​១០ម៉ែត្រ បណ្ដាលឲ្យម្ចាស់ម៉ូតូស្លាប់ភ្លាមៗយ៉ាងអាណោចធម៌ រីឯរថយន្ដទាំងពីរគ្រឿងបានបើកគេចបាត់ស្រមោល។

ក្រោយពេលកេីតហេតុសមត្ថកិច្ចបានចុះមកដល់កន្លែងកេីត​ហេតុនិងធ្វេីការវាស់វែងយកម៉ូតូជនរងគ្រោះទៅរក្សាទុករង​ចាំសាច់ញាតិយកឯកសារមកផ្ទៀងផ្ទាត់និងប្រគល់ឲ្យវិញ​។ ចំណែកសពជនរងគ្រោះត្រូវបានសមត្ថកិច្ចធ្វើកំណត់ហេតុ​រួច ប្រគល់ទៅក្រុមគ្រួសារយកទៅធ្វេីបុណ្យតាមប្រពៃណី៕