គួរឲ្យអាសូរ! ស្ត្រីវ័យចំណាស់ម្នាក់ដើរហាត់ប្រាណត្រូវម៉ូតូកង់បីឥណ្ឌាបុកស្លាប់ទាំងព្រឹក
ភ្នំពេញ៖ ស្ត្រីវ័យចំណាស់ម្នាក់ដើរហាត់ប្រាណតាមផ្លូវត្រូវម៉ូតូកង់បីឥណ្ឌា បើកបុកពីក្រោយពេញទំហឹងស្លាប់ភ្លាមៗនៅកន្លែងគួរឲ្យអាសូរ ៖ គ្រោះថ្នាក់ចរាចរណ៍នេះបង្កការណ៍ភ្ញាក់ផ្អើលកាលពីវេលាម៉ោង០៥និង២០នាទីព្រឹកថ្ងៃទី២១ ខែមិនា ឆ្នាំ២០១៩ នៅតាមបណ្ដោយផ្លូវបេតុង ភូមិចំការឪឡឹក១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ចបានឲ្យថាសពស្ត្រីរងគ្រោះមានឈ្មោះ យ៉ែម សារី ហៅ អូន អាយុ៦១ឆ្នាំ មុខរបរនៅផ្ទះ ស្នាក់នៅជាមួយកូននៅ ភូមិ ចំការឪឡឹក២ សង្កាត់កាកាបទី២ ខណ្ឌពោធិ៍សែនជ័យ និងមានស្រុកកំណើតនៅស្រុកមុខកំពូល ខេត្តកណ្ដាល។
តាមសម្តីក្រុមគ្រួសារបានឲ្យដឹងថា៖ ស្រ្តីរងគ្រោះជួនស្នាក់ នៅជាមួយកូននៅស្រុកអង្គស្នួល ជួនមកស្នាក់នៅជាមួយកូន នៅភូមិចំការឪឡឹក២ហើយជនរងគ្រោះ មកស្នាក់នៅជាមួយកូននៅភូមិចំការឪឡឹក២សង្កាត់កាកាបទី២ នេះជួយមើលថែចៅៗ ហើយជារៀងរាល់ព្រឹក តែងតែដើរហាត់ប្រាណ និងនៅព្រឹកថ្ងៃកើតហេតុនេះ គាត់ដើរចេញក្រៅហាត់ប្រាណតាមផ្លូវដូចសព្វដង ស្រាប់តែជួបគ្រោះថ្នាក់បែបនេះតែម្តង ។
បើតាមប្រជាពលដ្ឋ រស់នៅក្បែរកន្លែងកើតហេតុបានឲ្យដឹងថា មុនពេលកើតហេតុ ជនរងគ្រោះដើរហាត់ប្រាណ តាមផ្លូវបេតុងខាងលើ ទិសដៅពីជើងទៅត្បូង មួយសន្ទុះ ក៏បានដើរត្រឡប់មកវិញ ហើយឆ្លៀតចូលទិញនំឆាខ្វៃចំនួន២គូរ កាន់នៅដៃផង ខណៈដើរដល់ចំណុចកើតហេតុស្រាប់តែមានម៉ូតូកង់បីឥណ្ឌា ពណ៌ស មួយគ្រឿង មិនចាំស្លាកលេខបើកមកពីក្រោយជ្រុលបុកពេញទំហឹងផ្លោងរមៀល ជនរងគ្រោះបោក ក្បាលនិងថ្នាល់ស្លាប់ភ្លាមៗនៅកន្លែង ចំណែកម៉ូតូបង្កបើករត់គេចបាត់ស្រមោល ។
ក្រោយពេលកើតហេតុ សមត្ថកិច្ចមូលដ្ឋានចុះទៅពិនិត្យនិងធ្វើកំណត់ហេតុប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី ៕
