បើករថយន្តលុចស៊ីសRX350បុកម៉ូតូនិងរថយន្តបង្កការខូចខាតបើករត់មិនដោះស្រាយសមត្ថកិច្ចផ្ទុះអាវុធ២គ្រាប់
ភ្នំពេញ ៖ បុរសម្នាក់សង្ស័យស្រវឹងស្រាជោគជាំបានបើករថយន្ត ទំនើបបោះពួយលឿនដូចហោះមិនប្រយត្ន័ជ្រុលទៅបុកម៉ូតូមួយគ្រឿងហើយព្យាយាមបើតរត់ ក៏បានបុករថយន្តកាមរីបាឡែនមួយគ្រឿងទៀតនៅតែមិនព្រមឈប់នៅតែបន្តបើករត់ទៀតត្រូវសមត្ថកិច្ចបាញ់២គ្រាប់ បំបែកកង់ទៅមុខលែងរួច។
ហេតុការណ៍បង្កការភ្ញាក់ផ្អើលនេះបានកើតឡើងនៅវេលាម៉ោង០៩ និង៤០នាទីយប់ថ្ងៃទី២៩ ខែមិនា ឆ្នាំ២០១៩ នៅតាមបណ្ដោយផ្លូវជាតិលេខ១ ក្នុងសង្កាត់វាលស្បូវ ខណ្ឌច្បារអំពៅ ។
បើយោងតាមប្រភពនៅកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់សង្ស័យស្រវឹងស្រាបានបើករថយន្តទំនើបម៉ាកលុចស៊ីសRX350ពណ៌ស ពាក់ស្លាកលេខ សៀមរាប2A-1830ធ្វើដំណើរតាមបណ្ដោយផ្លូវជាតិ លេខ១ទិសដៅពីកើតទៅលិចក្នុងល្បឿនយ៉ាងលឿនហើយបានជ្រុលទៅបុកម៉ូតូមួយគ្រឿងពេញទំហឹងបណ្ដាលបុរសម្នាក់រងរបួស ហើយរថយន្តបង្ករមិនព្រមឈប់ទទួលខុសត្រូវនោះទេក៏បានព្យាយាមបើករត់រហូតមកដល់ចំណុចសាលាភូមិន្ទរដ្ឋាបាលសង្កាត់ទន្លេបាសាក់បានជ្រុលទៅបុករថយន្តកាមរីបាឡែនមួយគ្រឿងទៀតបណ្ដាលរងការខូចខាតមួយចំហៀងខាងឆ្វេងហើយព្យាយាមបើករត់បន្តទៀតរហូតមកដល់ចំណុចមុខវត្តមហាមន្ត្រីផ្លូវព្រះស៊ីហនុត្រូវសមត្ថកិច្ចកាក់អោយឈប់តែនៅមិនព្រមឈប់ទើបសមត្ថិច្ចសម្រេចចិត្តផ្ទុះអាវុធ២គ្រាប់បាញ់បំបែកកង់ទើបទៅមុខលែងរួច។
ក្រោយពេលកើតហេតុសមត្ថកិច្ចខណ្ឌច្បារអំពៅបានស្ទូចរថយន្តបង្ករនិងយកម្ចាស់រថយន្តទៅអធិការដ្ឋានខណ្ឌច្បារអំពៅរងចាំដោះស្រាយតាមផ្លូវច្បាប់ ៕
