រន្ធត់ណាស់ព្រះអើយ! ប្ដីជិះម៉ូតូឌុបប្រពន្ធមកពីលេងផ្ទះមីងត្រូវរថយន្តបើកប៉ះជួលបោកក្បាលនិងថ្នល់ស្លាប់ប្រពន្ធ ប្ដីរបួសស្រាល
ភ្នំពេញ៖ បុរសម្នាក់ជិះម៉ូតូឌុបប្រពន្ធមកពីលេងផ្ទះម្ដាយមីងត្រូវរថយន្តក្រឡុកសុីម៉ង់បើកកៀរទាក់ដៃចង្កូតដួលបណ្ដាល ឲ្យស្ត្រីជាប្រពន្ធបោកក្បាលនិងថ្នល់ស្លាប់មួយរំពេច ឯបុរសជាប្ដីរងរបួសស្រាល
គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីវេលាម៉ោង៩និង១០នាទីយប់ថ្ងៃទី២១ ខែមេសា ឆ្នាំ២០១៩ នៅតាមបណ្ដោយផ្លូវជាតិលេខ៣ ក្នុងសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។
សពជនរងគ្រោះមានឈ្មោះ ជា ស្រីលីង ភេទស្រី អាយុ២០ឆ្នាំ មុខរបរកម្មកររោងចក្រ ស្នាក់នៅផ្ទះជួល ក្នុងភូមិជម្ពូវ័ន្ត សង្កាត់ចោមចៅទី៣ ខណ្ឌពោធិ៍សែនជ័យ និងមានស្រុកកំណើតនៅភូមិវៀលឃុំបុសមន ស្រុករំដួល ខេត្តស្វាយរៀង។ រីឯប្តីរបួសស្រាល មានឈ្មោះ វ៉ាន់ លីណា អាយុ២៥ឆ្នាំមុខរបរកម្មកររោងចក្រ រស់នៅភូមិជាមួយគ្នា មានស្រុកកំណើតនៅស្រុកព្រៃឈរ ខេត្តកំពង់ចាម។
បើតាមសម្ដីជនរងគ្រោះបុរសជាប្ដី បានប្រាប់ទាំងទឹកភ្នែកថា រូបគាត់និងភរិយា បានឌុបគ្នាមកពីលេងផ្ទះមីង ដោយធ្វើដំណើរតាមបណ្ដោយផ្លូវជាតិលេខ៣ ទិសដៅពីត្បូងទៅជើង បំណងទៅផ្ទះជួលវិញ ខណះមកដល់ចំណុចកើតហេតុ ស្រាប់តែមានរថយន្តម៉ាកFUSOប្រភេទក្រឡុកសុីម៉ង់ ពណ៌ក្រហមលាយទឹកប្រាក់ ពាក់ស្លាកលេខភ្នំពេញ 3A-3143 បានបើកស្របទិសគ្នាមកពីក្រោយ ហើយទាក់ដៃចង្កូតម៉ូតូរបស់គាត់បណ្ដាលឲ្យដួល ដែលធ្វើឲ្យស្ត្រីជាប្រពន្ធដែលមិនបានពាក់មួកសុវត្តិភាពបោកក្បាលនិងថ្នល់ស្លាប់ភ្លាមៗ រីឯបុរសជាប្ដីដែលបានពាក់មួកសុវត្តិភាពរងរបួសស្រាល ។ បន្ទាប់ពីកើតហេតុភ្លាមៗរថយន្តបង្កមិនបានឈប់នៅនិងកន្លែងនោះទេ ដោយព្យាយាមបើកគេចបានប្រហែលជិត១គីឡូម៉ែត្រក៏ត្រូវប្រជាពលរដ្ឋដេញឃាត់បានរថយន្ត តែតៃកុងបានគេចខ្លួនបាត់ ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់ រួចបានទាក់ទងទៅជំនាញចរាចរណ៍ក្រុងឲ្យមកធ្វើការ វាស់វែងយករថយន្តបង្ក និងម៉ូតូរងគ្រោះទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយតាមច្បាប់ ។ ចំណែកសពស្ត្រីរងគ្រោះ សមត្ថកិច្ចបានធ្វើកំណត់ហេតុប្រគល់ឲ្យប្ដី និងសាច់ញាតិ ដឹកយកទៅធ្វើបុណ្យតាមប្រពៃណី ៕
