សង្ស័យប្រើថ្នាំញៀនលើសកម្រិតរហូតមានជម្ងឺសសៃប្រសាតចងកស្លាប់ចោលឪពុកម្ដាយទាំងវ័យក្មេង
ភ្នំពេញ៖ យុវជនម្នាក់សង្ស័យប្រើប្រាស់ថ្នាំញៀនលើសកំរិត និងមានជម្ងឺសសៃប្រសាតបានចងកសម្លាប់ខ្លួននៅក្នុងបន្ទប់ទឹក បង្កការភ្ញាក់ផ្អើលកាលវេលាម៉ោង០៧និង៣០នាទីយប់ ថ្ងៃទី២៦ ខែមេសា ឆ្នាំ២០១៩ ស្ថិតក្នុងភូមិព្រៃវែងខាងកើត សង្កាត់ព្រៃវែង ខណ្ឌដង្កោ រាជធានីភ្នំពេញ
សពជនរងគ្រោះមានឈ្មោះ ភាព ឧត្តម ភេទប្រុស អាយុ២៦ឆ្នាំ មុខរបរនៅផ្ទះ រស់នៅផ្ទះគ្មានលេខ ទីតាំងកើតហេតុខាងលើ ។
តាមសម្តីស្ត្រីជាម្តាយជនរងគ្រោះមានឈ្មោះ ហ៉ឹម លាង ភេទស្រី អាយុ៦៥ឆ្នាំ មុខរបរនៅផ្ទះ បានរៀបរាប់ អួលដើមក៏ថា កូនប្រុសគាត់មុនពេលកើតហេតុ រូបគាត់បានដើរចូលទៅក្នុងបន្ទប់ទឹកក៏បានឃើញកូនប្រុសគាត់(ជនរងគ្រោះ)ឈរក្នុងបន្ទប់ទឹកដោយពុំបើកភ្លើងហើយគាត់ក៏មិនចាប់អារម្មណ៍ ក៏ដើរចូលក្នុងផ្ទះវិញក្រោយមកដោយមានការសង្ស័យគាត់ក៏ដើរទៅមើលម្តងទៀង ពេលនោះគាត់បានបើកភ្លើងស្រាប់តែឃើញកូនប្រុស គាត់
ចងក ដោយយកក្រម៉ាចងភ្ជាប់និងធ្នឹមដំបូលបន្ទប់ទឹករួចគាត់ក៏រត់មកហៅបងប្អូនឲ្យមកជួយនិងស្រាយក្រម៉ាយកជនរងគ្រោះមកដាក់លើគ្រែដោយធ្វើចលនាជួយសង្គ្រោះតែជនរងគ្រោះដាច់ខ្យល់ស្លាប់បាត់ទៅហើយ រួចក៏រាយការណ៍ជូនសមត្ថកិច្ចមូលដ្ឋានតែម្តង ។
យោងតាមការសន្និដ្ឋាននិងការធ្វើកោសល្យវិច្ឆ័យរបស់សមត្ថកិច្ចជំនាញបានឲ្យដឹងថា ជនរងគ្រោះពិតជាស្លាប់ដោយសារ (ចងកធ្វើអត្តឃាតពិតប្រាកដមែន) មូលហេតុ ( ជនរងគ្រោះធ្លាប់ប្រើប្រាស់គ្រឿងញៀន និង មានជម្ងឺសសៃប្រសាទជាប់ខ្លួន )។
បច្ចុប្បន្នសពជនរងគ្រោះត្រូវបានសមត្ថកិច្ចធ្វើកំណត់ហេតុប្រគល់អោយទៅក្រុមគ្រួសារយកទៅធ្វើបុណ្យតាមប្រពៃណី ៕
