ព្រៃផ្សៃណាស់ ! ចាប់រំលោភក្មេងស្រីអាយុ៤ឆ្នាំរួចសម្លាប់

ភ្នំពេញ៖ រន្ធត់ណាស់ក្មេងស្រីម្នាក់អាយុទើបតែ៤ឆ្នាំត្រូវបុរសចិត្តតិរច្ឆានម្នាក់រស់នៅក្បែផ្ទះចាប់រំលោភរួចសម្លាប់យកទៅទម្លាក់ក្នុងពាងទឹកនៅលើផ្ទះដែលគេទុកចោល
ហេតុការភ្ញាក់ផ្អើលនិងគួរឲ្យសង្វេកនេះបានកើតឡើងកាល ពីវេលាម៉ោង១១យប់ ថ្ងៃទី២៩ ខែឧសភា ឆ្នាំ២០១៨ នៅត្រង់ចំណុចលើផ្ទះគេទុកចោល ស្ថិតក្នុងភូមិ ក សង្កាត់ច្រាំងជំរះ២ ខណ្ឌឬស្សីកែវ រាជធានីភ្នំពេញ ។
បន្ទាប់ពីធ្វើសកម្មភាពជនសង្ស័យចិត្តតិរច្ឆានដឹងខ្លួនរត់គេច បានប្រហែល២ម៉ោងក៏ត្រូវបានកម្លាំងសមត្ថកិច្ចខណ្ឌឬស្សីកែវតាមប្រមាញ់ចាប់បានយកមកសួរនាំ ។

សពក្មេងស្រីរងគ្រោះមានឈ្មោះ ខា ស្រីច័ន្ទ អាយុ៤ឆ្នាំ មានម្ដាយឈ្មោះ ម៉ា ចាយ អាយុ២៦ឆ្នាំមានទីលំនៅក្បែរទីតាំងកើតហេតុខាងលើ ។ ចំណែកជនដៃដល់ចិត្តព្រៃផ្សៃមានឈ្មោះ អាយ៊ី ហៅ អាដំឡូង អាយុជាង៣០ ឆ្នាំមានមុខរបរលក់ដំឡូង ស្នាក់នៅកន្លែងកើតហេតុ។

តាមសម្ដីប្រជាបលរដ្ឋដែលនៅក្បែរកន្លែងកើតហេតុបានឲ្យដឹងថា មុនពេលកើតហេតុ គឺក្មេងស្រីរងគ្រោះខាងលើ បានរត់លេងជាមួយក្មេងៗឯទៀត តែក្រោយមកក៏បានបាត់ក្មេងស្រីរងគ្រោះអស់រយះពេលជាង២ម៉ោង ហើយត្រូវបានឪពុកម្ដាយ រួមទាំងសាច់ញាតិអ្នកភូមិជួយដើររក ។ ពេលនោះ ពូបង្កើតក្មេងស្រីរងគ្រោះឡើងទៅលើផ្ទះឈើដែលគេទុកចោលយូខែមកហើយនិងបានអើតមើលក្នុងពាងទឹកលើផ្ទះ ស្រាប់តែប្រទះឃើញសពកូនស្រីដេកស្លាប់ក្នុងពាងទឹកដោយអាក្រាតកាយ ។ ភ្លាមៗនោះទោះបីជាក្មេងស្រីរងគ្រោះបានស្លាប់បាត់បង់ជីវិតក៏ដោយក៏ឪពុកម្តាយក្មេងស្រីរងគ្រោះបានព្យាយាមដឹកយកកូនទៅសង្រ្គោះនៅមន្ទីរពេទ្យសម្ដេចឪ សម្ដេចម៉ែ តែជាអកុសលក្មេងស្រីរងគ្រោះបានស្លាប់បាត់បង់ជីវិតមុនពេលបញ្ចូនមកមន្ទីរពេទ្យបាត់ទៅហើយ។

ក្រោយមកសមត្ថកិច្ចជំនាញបានចុះទៅធ្វើកោសល្យវិច្ឆ័យ និងធ្វើកំណត់ហេតុប្រគល់សពក្មេងស្រីរងគ្រោះ ឲ្យទៅក្រុមគ្រួសារដឹកយកទៅធ្វើបុណ្យតាមប្រពៃណី ។ ដោយឡែក សង្ស័យត្រូវបានសមត្ថកិច្ចបញ្ជួនខ្លួនទៅសាកសួរនៅអធិការ នគរបាលខណ្ឌ ឫស្សីកែវដើម្បីកសាងសំណុំរឿងបញ្ជួនទៅតុលាការ ៕