អាវុធហត្ថចាប់ខ្លួនឃាតកសម្លាប់នារីជាស្រីស្នេហ៍ក្នុងផ្ទះសំណាក់ «រំចង់»បានហើយ
ព្រៃវែង៖ ជនសង្ស័យជាឃាតកដែលបាននាំនារីជាស្រីស្នេហ៍ទៅដេកនៅផ្ទះ សំណាក់(រំចង់)រួចយកខ្សែរឹតក សម្លាប់ចោលប្លន់យក ទ្រព្យសម្បត្តិនោះ ត្រូវបានកងកម្លាំង រាជអាវុធហត្ថខេត្តកណ្តាល សហការជាមួយកម្លាំងអាវុធហត្ថខេត្តព្រៃវែង ចាប់ខ្លួនបានហើយ នៅព្រឹកថ្ងៃទី១០ ខែឧសភា ឆ្នាំ២០១៩នៅចំណុចឃុំសំរោងធំ ស្រុកកៀនស្វាយ ខេត្តកណ្តាល។
ឃាតកដែលសម្លាប់នារីវ័យក្មេង នៅក្នុងផ្ទះសំណាក់ «រំចង់» ខេត្តព្រៃវែង ត្រូវបានកងកម្លាំងរាជអាវុធហត្ថខេត្តកណ្តាល បានសហការជាមួយកងកម្លាំងរាជអាវុធហត្ថខេត្តព្រៃវែង ចាប់ខ្លួនបានហើយ បន្ទាប់ពីធ្វើសកម្មភាពមួយចំអិនកំពិស នៅចំណុចឃុំសំរោងធំ ស្រុកកៀនស្វាយ ខេត្តកណ្តាល។
ជនសង្ស័យឈ្មោះ ជា ជាង ភេទប្រុសអាយុ៣០ឆ្នាំមានទីលំនៅភូមិជ្រោយដងឃុំសំរោងធំ ស្រុកកៀនស្វាយខេត្តកណ្ដាល។ សមត្ថកិច្ចដកហូតម៉ូតូបានម៉ាកឌ្រីមសង់C125ពណ៌ខ្មៅ ជារបស់ជនសង្ស័យមួយគ្រឿង។
ចំណែកនារីរងគ្រោះឈ្មោះ ផែ ស្រីម៉ាក់ភេទស្រីអាយុ២៥ឆ្នាំ មានទីលំនៅភូមិព្រែកបាក់ ឃុំព្រែកទន្លាប់ ស្រុកលើកដែក ខេត្តកណ្ដាល។ មានប្ដីនិងកូន២នាក់ប៉ុន្តែមួយរយៈចុងក្រោយនេះ នាងបានលួចទាក់ទងមានស្នេហាជាជនសង្ស័យ។
គួរំលឹកថា កាលពីវេលាម៉ោង០៤និង១៥នាទីរសៀលថ្ងៃទី០៨ខែឧសភាឆ្នាំ២០១៩ មានការភ្ញាក់ផ្អើលមានករណីរឹតកសម្លាប់ស្ត្រីរងគ្រោះ នៅក្នុងបន្ទប់ លេន207ផ្ទះសំណាក់ (រំចង់)ស្ថិតនៅភូមិ៥ឃុំព្រែកខ្សាយ(ខ)ស្រុកពាមរក៍ ខេត្តព្រៃវែង។
បច្ចុប្បន្នជនសង្ស័យខាងលើ ត្រូវបានកម្លាំងអាវុធហត្ថខេត្តកណ្តាល ប្រគល់ជូនកម្លាំង អាវុធហត្ថខេត្តព្រៃវែង ដើម្បីចាត់ការបន្តចាត់ការនីតិវិធី៕
