ជិះម៉ូតូឌុបគ្នាទៅធ្វើសក់មេឃកំពុងភ្លៀងត្រូវរថយន្តដឹកដី បុកពីក្រោយក្រឡាប់កិនស្លាប់ម្នាក់និងម្នាក់ទៀតរបួសស្រាល
ភ្នំពេញ៖ ស្ត្រីម្នាក់បានស្លាប់បាត់បង់ជីវិតយ៉ាងអាណោចអាធម៌នឹងម្នាក់ទៀតបានរងរបួសស្រាល ខណៈជិះម៉ូតូឌុបគ្នាទៅធ្វើសក់ផាតមុខនៅផ្សារទួលពង្រតែអកុសលត្រូវរថយន្តដឹកដីបើកបុកពីក្រោយនឹងកិនពេញទំហឹង កាលពីវេលាម៉ោង ២នឹង៣០នាទី រសៀលថ្ងៃទី២២ ខែឧសភាឆ្នាំ ២០១៩ ករណីចរាចរនេះស្ថិតនៅតាមបណ្តោយផ្លូវបេងតុង ភូមិព្រៃស សង្កាត់ព្រៃស ខណ្ឌដង្កោ រាជធា នីភ្នំពេញ ។
សមត្ថកិច្ចបានអោយដឹងថា សពស្ត្រីរងគ្រោះមានឈ្មោះ រិន ធីតា ភេទស្រី អាយុ ៣០ឆ្នាំ មុខរបរកម្មការនីរោងចក្រ (អ្នកជិះពីក្រោយ ) នឹងអ្នករបួសឈ្មោះ រិន ស្រីពេជ្រ ភេទស្រី អាយុ ២៨ ឆ្នាំ (អ្នកឌុប) អ្នកទាំងពីរមានស្រុកកំណើតភូមិអញ្ជាញ សង្កាត់ស្ពានថ្មខណ្ឌដង្កោ។ ប្រភពបន្តថាមុនពេលកើតហេតុអ្នកទាំងពីរបានជិះម៉ូតូម៉ាកសេ ១២៥ ពណ៌ខ្មៅ ពាក់ស្លាកលេខ ភ្នំពេញ 1FA 4828 ឌុបគ្នាចេញពីផ្ទះទៅធ្វើសក់នឹងផាត់មុខ ដើម្បីចូលរួមមង្គលការប្អូនជីដូនមួយ ខណៈធ្វើដំណើរដល់ចំណុចកើតហេតុក៏មានភ្លៀងធ្លាក់ ពេលនោះមានរថយន្តដឹកដីពាក់ស្លាកលេខ ខេមរៈភូមិន្ទ 3-3447បើកបរដោយបុរសម្នាក់ក្នុងល្បឿនលឿន ហើយជាន់ហ្វ្រាំងមិនសុីក៏ជ្រុលរអិលទៅបុកចំស្ត្រីទាំងពីរនាក់កំពុងជិះម៉ូតូពីក្រោយពេញទំហឹង បណ្តាលអោយរថយន្តក្រឡាប់កិនស្ត្រីម្នាក់ស្លាប់បាត់បង់ជីវិតភ្លាមៗនៅហ្នឹងកន្លែងកើតហេតុ នឹងម្នាក់ទៀតខ្ទាតទៅម្ខាងរងរបួសស្រាល ចំណែកតៃកុងរថយន្តបង្កបានចុះរត់គេចខ្លួនបានស្រមោល ។
ក្រោយកើតហេតុសមត្ថកិច្ចមូលដ្ឋានបានសហការជាមួយនគរបាលជំនាញចុះវាស់វែងអូសយករថយន្តបង្កនឹងម៉ូតូរបស់ជនរងគ្រោះទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយតាមច្បាប់នៅពេលក្រោយ ចំណែកសពស្ត្រីខាងលើត្រូវបានសមត្ថកិច្ចធ្វើឯកសារប្រគល់ជូនក្រុមគ្រួសារដឹកយកទៅធ្វើបុណ្យតាមប្រពៃណី ៕
