សមត្ថកិច្ចឃាត់ខ្លួនជនសង្ស័យ៣នាក់រួមនិងដាវសាម៉ូរ៉ៃ៣ដើមម៉ូតូ១គ្រឿង
ភ្នំពេញ៖ កម្លាំងនគរបាលខណ្ឌទួលគោកជិះល្បាតក្នុងមូលដ្ឋានប្រទះឃើញជនសង្ស័យ ៣នាក់ជិះម៉ូតូមួយគ្រឿង ដោយមានការសង្ស័យក៏បានកាក់ឆែកឆែស្រាប់តែឃើញមានដាវសាម៉ូរ៉ៃជាប់និងខ្លួនចំនួន៣ដើម ក៏បាន ឃាត់ខ្លួនយកមកសួរនាំតែម្ដង ។
-ហេតុការណ៍នេះបានកើតឡើងកាលពីវេលាម៉ោង១២និង៤០នាទីរំលងអធ្រាតឈាន ចូលថ្ងៃទី៣១ ខែឧសភា ឆ្នាំ២០១៩ នៅតាមបណ្ដោយផ្លូវ៥៩៨ ចំណុចជិតស្តុបត្រឡោកបែក ក្នុងសង្កាត់ទឹកល្អក់១ ខណ្ឌទួលគោក រាជធានីភ្នំពេញ ។
សមត្ថកិច្ចមូលដ្ឋានបានឲ្យដឹងថា ជនសង្ស័យទី១មានឈ្មោះ ហេង វុត្ថា ភេទប្រុស អាយុ២០ឆ្នាំមុខរបសន្តិសុខយាមផ្ទះសំណាក់ ស្នាក់នៅសង្កាត់ផ្សារដើមថ្កូវខណ្ឌចំការមន ។ ទី២ ឈ្មោះ ឡុង ឡៃ ភេទប្រុសអាយុ២១ឆ្នាំ មុខរបមិនពិតប្រាកដ ស្នាក់នៅបន្ទប់ជួល ក្នុងសង្កាត់បឹងកក់២ ខណ្ឌទួលគោក ។ និងទី៣ ឈ្មោះ រ៉េត ថារ៉ា ភេទប្រុស អាយុ២៣ឆ្នាំ មុខរបបមិនពិតប្រាកដ ស្នាក់បន្ទប់ជួលសង្កាត់បឹងកក់២ ខណ្ឌទួលគោក ។
សមត្ថកិច្ចបានបន្តថា មុនឈានទៅដល់ឃាត់ខ្លួនជនសង្ស័យខាងលើគឺកម្លាំងនគរបាលខណ្ឌទួលគោកបានជិះម៉ូតូល្បាតក្នុងភូមិសាស្ត្រដើម្បីទប់ស្កាត់បទល្មើសផ្សេងៗការពាជូនប្រជាពលរដ្ឋក្នុងមូលដ្ឋាន ស្រាប់តែប្រទះឃើញជនសង្ស័យមានគ្នា៣នាក់ជិះម៉ូតូមួយគ្រឿងម៉ាកឌ្រីមសង់០១៣ពណ៌ខ្មៅ ពាក់ស្លាកលេខភ្នំពេញ1BP-2124ធ្វើដំណើរ ក្នុងទិសដៅពីត្បូងទៅជើង ដោយមានការសង្ស័យសមត្ថកិច្ចបានហៅឲ្យឈប់ តែជនសង្ស័យទាំងបីនាក់មិនព្រមឈប់ នោះទេទើបកម្លាំងសមត្ថកិច្ចបានជិះម៉ូតូដេញតាមពីក្រោយកាក់ពីមុខធ្វើឲ្យជនសង្ស័យភ័យស្លន់ស្លោកផ្ដួលម៉ូតូចោលនិងធ្លាក់ដាវសាម៉ូរ៉ៃ ហើយបំរុងរត់គេចខ្លួន ត្រូវកម្លាំងសមត្ថកិច្ចក្របួចបានទាំងបីនាក់ភ្លាមៗតែម្ដង។
ក្រោយឃាត់ខ្លួន ជនសង្ស័យទាំងបីនាក់ រួមទាំងវត្ថុតាងខាងលើត្រូវបានកម្លាំងសមត្ថកិច្ចខណ្ឌទួលគោកនាំមកប៉ុស្តិ៍ទឹកល្អក់១ដើម្បីសាកសួរនិងធ្វើកំណត់ហេតុ កសាងសំណុំរឿងបញ្ជូនទៅអធិការដ្ឋាននគរបាលខណ្ឌ
ទួលគោក ដើម្បីចាត់ការបន្តតាមផ្លូវច្បាប់៕
