នាយឧត្តមសេនីយ៍ នេត សាវឿន បញ្ជាឲ្យស្នងការរាជធានី-ខេត្ត តាមចាប់ខ្លួនបុរសម្នាក់ ដែលដើរបោកប្រាក់គេដើម្បីរត់ការចូលក្របខ័ណ្ឌមន្ដ្រីនគរបាលជាតិ

ភ្នំពេញ៖ នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ បានបញ្ជាឲ្យស្នងការរាជធានី-ខេត្តទាំងអស់ ត្រូវស្រាវជ្រាវជាបន្ទាន់ និងចាប់ខ្លួនបុរសម្នាក់ ដែលបានធ្វើសកម្មភាពដើរបោកប្រាក់ប្រជាពលរដ្ឋ ដើម្បីរត់ការចូលក្របខ័ណ្ឌមន្ដ្រីនគរបាលជាតិ ដោយមិនបាច់ឆ្លងកាត់ការប្រឡងជ្រើសរើសនោះឡើយ។

មន្ដ្រីនគរបាលជាន់ខ្ពស់ នៃអគ្គស្នងការដ្ឋាននគរបាលជាតិ បានបញ្ជាក់ថា ក្រោយទទួលបានព័ត៌មាននេះ នាយកដ្ឋានបុគ្គល នៃអគ្គស្នងការដ្ឋាននគរបាលជាតិ ក៏បានស្រាវជ្រាវដូចគ្នាផងដែរ ទៅលើបុគ្គលរូបនោះ ដែលមានរូបថតពាក់ឯកសណ្ឋានគរបាលជាតិដែរនោះ គឺមិនមានឈ្មោះក្នុងក្របខ័ណ្ឌមន្ដ្រីនគរបាលជាតិនោះទេ។

មន្ដ្រីនគរបាលជាតិខ្ពស់រូបនេះ បានប្រាប់បណ្ដាញព័ត៌មាន ឲ្យដឹងនៅព្រឹកថ្ងៃទី០៦ ខែមិថុនា ឆ្នាំ២០១៩នេះយ៉ាងដូច្នេះថា «នាយឧត្តមសេនីយ៍ អគ្គស្នងការ បានដាក់បទបញ្ជាឲ្យស្នងការរាជធានី-ខេត្ត ដែលបង្ហោះតាមបណ្ដាញសង្គមថា រើសក្របខ័ណ្ឌចូលប៉ូលីសយកលុយ។ ឥលូវខាងបុគ្គលិកត្រួតពិនិត្យទៅឈ្មោះនេះ មិនមានក្នុងក្របខ័ណ្ឌប៉ូលីសនោះទេ ដូច្នេះគ្រប់ស្នងការទាំងអស់ត្រូវស្រាវជ្រាវរក ហើយឃាត់ខ្លួនជាបន្ទាន់»។

យ៉ាងណាក៏ដោយ បុគ្គលដែលនាយឧត្តមសេនីយ៍ នេត សាវឿន បញ្ជាឲ្យស្រាវជ្រាវ និងចាប់ខ្លួនជាបន្ទាន់នោះ ត្រូវបានអ្នកប្រើប្រាស់បណ្ដាញសង្គមទម្លាយថា មានឈ្មោះ ឆាយ ឆដា និងប្រើប្រាស់គណនី Facebook ឈ្មោះ «Chhay Chorda» ប៉ុន្ដែគេមិនបានបញ្ជាក់ថា បុគ្គលរូបនេះមានទីលំនៅនៅកន្លែងណានោះទេ៕