រន្ធត់ទាំងព្រឹក!! ប្តីត្រូវស្លាប់ ប្រពន្ធរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍ ចំណែកជនបង្ករត់គេចខ្លួនបាត់

ខេត្តតាកែវ៖ យ៉ាងហោចណាស់បុរសម្នាក់ត្រូវស្លាប់និងស្ត្រីម្នាក់ទៀតរងរបួសធ្ងន់ ក្នុងគ្រោះថ្នាក់ចរាចរណ៍រវាងរថយន្តនិងម៉ូតូ នៅស្រុកត្រាំកក់​​ កាលពីវេលាម៉ោង០៩:៥០នាទីព្រឹក ថ្ងៃទី០៨ ខែមិថុនា ឆ្នាំ២០១៩ ស្ថិតនៅតាមបណ្តោយលើផ្លូវលេខ២២ ចន្លោះគីឡូម៉ែត្រលេខ០៨និងលេខ០៩ ក្នុងភូមិអំពិល ឃុំលាយបូរ ស្រុកត្រាំកក់ ខេត្តតាកែវ ។

ប្រភពពីសមត្ថកិច្ចបានអោយដឹងថា មុនដំបូងមានរថយន្តមួយគ្រឿង ម៉ាកហុីយ៉ាន់ដាយពណ៌ស គ្មានពាក់ផ្លាកលេខ (អ្នកបើកបរគេចខ្លួនបាត់) បើកបរមកពីទិសខាងកើត លុះមកដល់ចំណុចខាងលើបានបុកម៉ូតូមួយគ្រឿង ម៉ាកវីវ៉ា ពណ៌ខ្មៅ ពាក់ផ្លាកលេខ ភ្នំពេញ 1L-3525 បើកបរដោយឈ្មោះ ឈន គីមអេង ភេទប្រុស អាយុ៥៤ឆ្នាំ នៅភូមិព្រៃមោក ឃុំស្រែរនោង ស្រុកត្រាកក់ខេត្តតាកែវ មុខរបរកសិករ (ស្លាប់នៅកន្លែងកើតហេតុ) និងមានឌុបប្រពន្ធឈ្មោះ ខឹម សារ៉ាន់ អាយុ៤៨ឆ្នាំ មុខរបរកសិករ(របួសធ្ងន់) ។

ក្រោយពេលកើតហេតុ កម្លាំងជំនាញចុះដល់កន្លែងកើតហេតុ បានបញ្ជូនជនរងគ្រោះទៅសង្គ្រោះនៅមន្ទីរពេទ្យបង្អែកក្រុងដូនកែវ និងធ្វើកំណត់ហេតុដកហូតវត្ថុតាងខាងលើយកទៅរក្សាទុកនៅអធិការដ្ឋាននគរបាលស្រុកត្រាំកក់ ដើម្បីធ្វើការស្រាវជ្រាវបន្ត រីឯសាកសពបានប្រគល់ជូនសាច់ញាតិយកទៅធ្វើបុណ្យតាមប្រពៃណី៕