រថយន្ត៣គ្រឿងបុកគ្នាឆាបឆេះបណ្ដាលឲ្យស្លាប់មនុស្ស១១នាក់និងរបួសធ្ងន់៤នាក់
កំពង់ស្ពឺ៖ មន្ត្រីនគរបាលនៃស្នងការរដ្ឋានខេត្តកំពង់ស្ពឺបានថ្លែងប្រាប់សារព័ត៌មានក្នុងស្រុកថាមានមនុស្សស្លាប់បានកើនឡើងដល់១១នាក់ហើយក្នុងនោះមានស្រីម្នាក់ដោយឡែកអ្នករងរបួសមាន៤នាក់កំពង់សង្គ្រោះនៅមន្ទីពេទ្យ។ហេតុការណ៍គ្រោះថ្នាក់ចរាចរដ៏រន្ធត់នេះ បានកេីតឡេីងកាលពីវេលាម៉ោងជាង៦ល្ងាចថ្ងៃ០៨ខែមិថុនាឆ្នាំ២០១៩ នៅលេី ផ្លូវជាតិលេខ៤ចន្លោះគីឡូម៉ែត្រលេខ៨៥.៨៦ ក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
បើតាមសមត្ថកិច្ចនគរបាលខេត្តកំពង់ស្ពឺបានអោយដឹងថា គ្រោះថ្នាក់ចរាចរណ៍នេះ បានកើតឡើងរវាងរថយន្ត ៣គ្រឿងបុកគ្នា បណ្តាលឲ្យរថយន្ត២គ្រឿងឆាបឆេះ តាមការបញ្ជាក់ពីសមត្ថកិច្ចថាគ្រោះថ្នាក់ចរាចរណ៍នេះ បានកើតឡើង ដោយសារតែរថយន្ត HIGHLANDER បើកពីកើតទៅលិច (ភ្នំពេញ-ព្រះសីហនុ) បានវ៉ាជែងស្រាប់តែជ្រុលទៅបុករថយន្តទេសចរណ៍២៤កៅអី មួយគ្រឿងមកពីមុខ រួចក៏ជ្រុលទៅបុករថយន្តកូរ៉េដឹកទំនិញ បណ្តាលឲ្យផ្ទុះឆេះតែម្តង ធ្វើអោយមនុស្ស១១នាក់បានស្លាប់នៅនឹងកន្លែង ក្នុងនោះមនុស្ស៦នាក់ដែលជិះនៅក្នុងរថយន្ត HIGHLANDER បានស្លាប់ទាំងអស់ និងអ្នកស្លាប់៤នាក់ទៀតជិះនៅក្នុងរថយន្តទេសចរណ៍២៤កៅអី ហើយមួយចំនួនទៀតរងរបួសធ្ងន់។
ក្រោយកើតហេតុកម្លាំងសមត្ថកិច្ចបានចុះជួយអន្តរាគមន៍ភ្លាមៗផងដែរ ជាមួយនឹងការដឹកជញ្ជូនអ្នករបួសទៅមន្ទីរពេទ្យ ៕
