ទុសេខ្សែភ្លើង ឆាបឆេះផ្ទះល្វែងរបស់ប្រជាពលរដ្ឋអស់មួយល្វែងនៅខណ្ឌពោធិ៍សែនជ័យ

ភ្នំពេញ ៖ ផ្ទះប្រជាពលរដ្ឋចំនួន១ខ្នង ដែលស្ថិតនៅតាមបណ្ដោយផ្លូវបេតុងមួយកន្លែង ក្នុងភូមិក្បាលដំរី សង្កាត់កាកាប២ ខណ្ឌពោធិ៍សែនជ័យ ត្រូវបានអគ្គីភ័យឆាបឆេះអស់ទាំងស្រុង បង្កការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចេញរថយន្តមកអន្តរាគមន៍កាលពីវេលាម៉ោង១ និង១០នាទីរំលងអាធ្រាត ឈានចូលថ្ងៃទី២៥ ខែមិថុនា ឆ្នាំ២០១៩ ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា ដំបូងឡើយគឺ គេសង្កេតឃើញមានទុសេចរន្តអគ្គិសនីពីក្នុងផ្ទះខាងលើ ដោយមានម្ចាស់ផ្ទះកំពុងសម្រាកផងដែរ ។ ខណះពេលនោះ ខាងម្ចាស់ផ្ទះរងគ្រោះក៏ដឹងខ្លួន ហើយបាននាំកូនចៅរត់ចេញពីក្នុងផ្ទះភ្លាមៗ រីឯអណ្ដាតភ្លើងក៏ឆាបឆេះឡើងយ៉ាងសន្ធោសន្ធៅតែម្ដង បណ្ដាលឲ្យម៉ូតូចំនួន៣គ្រឿង និងទ្រព្យសម្បត្តិក្នុងផ្ទះមួយចំនួនធំ ត្រូវបានអគ្គីភ័យលេបត្របាក់អស់ទាំងស្រុង​ ។
បន្ទាប់ពីមានហេតុការណ៍ខាងលើនេះកើតឡើង​ ប្រជាពលរដ្ឋក៏បានរាយការណ៍ប្រាប់អាជ្ញាធរមានសមត្ថកិច្ចឲ្យចេញរថយន្តពន្លត់អគ្គីភ័យមកជួយអន្តរាគមន៍ ដោយសមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន៣គ្រឿង ទើបរលត់ទៅវិញជាស្ថាព័រ តែមិនបណ្ដាលឲ្យមនុស្សណាម្នាក់រងរបួសនោះឡើយ ៕