ចេញពីផឹកបើកថយន្តមិនប្រយត្ន័ជ្រុលបុកចូលកន្លែងផឹកសុីមួយទៀត កិនម៉ូតូ៨គ្រឿង ខូចខាតសម្ភារៈលក់ដូរមួយចំនួន
ភ្នំពេញ៖ បុរសម្នាក់ចេញពីរោងលក់ទឹកត្នោតជូរ សង្ស័យស្រវឹងបានបើករថយន្តបុកចូលរោងលក់ទឹកត្នោតជូរមួយកន្លែងទៀត និងកិនម៉ូតូ៨គ្រឿង និងខូចខាតសម្ភារៈអ្នកលក់ដូរមួយចំនួន ៖ ហេតុការណ៍នេះបានបង្កឲ្យមានការភ្ញាក់ផ្អើលដល់អ្នកផឹកសុីដូចគ្នា កាលពីវេលាម៉ោង៧និង៣០នាទីយប់ថ្ងៃទី១៤ ខែកក្កដា ឆ្នាំ២០១៩ នៅចំណុចរោងលក់ទឹកត្នោតជូរ យីហោឆេងលៀង១៦៨ ត្រង់ខាងលិចជាប់សួនកាណាឌីយ៉ា ស្ថិតក្នុងភូមិត្រពាំងថ្លឹង២ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ។
រថយន្តបង្ក ម៉ាកកាមរីបាឡែន ពណ៌ស ពាក់ស្លាកលេខ កំពង់ឆ្នាំង 2B-3799 បើកបរ ដោយបុរសម្នាក់មានស្ថានភាពស្រវឹងជោគជាំ ត្រូវបានសមត្ថកិច្ចឃាត់នាំយកទៅប៉ុស្តិ៍ចោមចៅ១ ធ្វើការសាកសួរ។
យោងតាមប្រពភព័ត៌មានពីប្រជាពលរដ្ឋបានឲ្យដឹងថា មុនកើតហេតុ គេឃើញអ្នកបើកបររថយនបង្ក ទើបតែងើបចេញពីកន្លែងផឹកសុីនៅហាងមួយកន្លែង ទល់មុខគ្នាជាមួយហាងកើតហេតុប្រហែល២០ម៉ែត្រ ។ ខណះពេលនោះក៏អ្នកបើករថយន្តបានរេចង្កូតបុកចូលរោងលក់ទឹកត្នោតជូរ និងបុកកិនម៉ូតូចំនួន៨គ្រឿង ក្នុងនោះមានម៉ូតូម៉ាកស្កុបពីស៊េរីឆ្នាំ២០២០ ពណ៌ស ពាក់ស្លាកលេខភ្នំពេញ1HT-1424 រងការខូចខាតមួយកំណាត់មុខស្ទើរតែទាំងស្រុង ដែលម្ចាស់ម៉ូតូបានបញ្ជាក់ប្រាប់ថាទេីបតែទិញបាន៣ថ្ងៃប៉ុណ្ណោះ ចំណែកម៉ូតូប៉ុន្មានគ្រឿងទៀតខូចខាតតិចតួចប៉ុណ្ណោះ ព្រមទាំងខូចខាតសម្ភារៈក្នុងហាងមួយចំនួន នឹងបង្កការភ័យខ្លាចដល់ភ្ញៀវដែលអង្គុយហូបចុកនៅទីនោះរត់ចែកជើងគ្នាបាតជើងសរ ព្រៀត ។
ក្រោយកើតហេតុភ្លាមៗ អ្នកបើកបរ ត្រូវបានប្រជាពលរដ្ឋឃាត់ខ្លួនប្រគល់ឲ្យសមត្ថកិច្ចនាំយកទៅប៉ុស្តិ៍នគរបាលរដ្ឋបាល ចោមចៅ១ រង់ចាំប្រគល់ឲ្យទៅមន្ត្រីជំនាញខាងការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ ទាំងអ្នកបើកបរ រថយន្ត និងម៉ូតូ ដើម្បីដោះស្រាយតាមច្បាប់ ៕
