ឯកឧត្តម កែន សត្ថា អភិបាលនៃគណះអភិបាលខេត្តកែប ជួបប្រជុំពិភាក្សាការងារជាមួយគណៈប្រតិភូទីក្រុងប៉ីហៃ នៃសាធារណះរដ្ឋប្រជាមានិតចិន
ខេត្តកែប៖ នាព្រឹកថ្ងៃព្រហស្បតិ៍២រោច ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៨ ខែកក្កដា ឆ្នាំ២០១៩ ឯកឧត្តម កែន សត្ថា អភិបាលនៃគណះអភិបាលខេត្តកែប ជួបប្រជុំពិភាក្សាការងារជាមួយគណៈប្រតិភូទីក្រុងប៉ីហៃ នៃសាធារណះរដ្ឋប្រជាមានិតចិន ដឹកនាំដោយឯកឧត្តម អ៊ូ អុីជុន អនុប្រធានគណះកម្មការកិច្ចប្រជុំពិគ្រោះយោបល់នយោបាយទីក្រុងបុីហៃ ដេីម្បីរឹតចំណងមិត្តភាពក្នុងទំនាក់ទំនងជាបងប្អូនក្នុងនាមជាខេត្តក្រុងចងសម្ព័ន្ធមេត្រីភាព និងសិក្សាស្វែងយល់ពាក់ព័ន្ធនឹងការងារជលផល និងទេសចរណ៍ សំដៅបង្កេីនកិច្ចសហប្រតិបត្តិលេីវិស័យនេះបន្ថែមទៀត។
មានប្រសាសន៍ក្នុងជំនួបប្រជុំពិភាក្សាខាងលេី ឯកឧត្តមប្រធានប្រតិភូក្រុងបុីហៃ បានថ្លែងអំណរគុណ និងវាយតម្លៃខ្ពស់ចំពោះកិច្ចសហប្រតិបត្តិការរវាងខេត្តក្រុងទាំងពីរនាពេលកន្លងមក ក៏ដូចជាពេលបច្ចុប្បន្ន ក្នុងកិច្ចខិតខំប្រឹងប្រែងរួមគ្នាសំដៅបម្រេីផលប្រយោជន៍រួម។ ឯកឧត្តម ក៏បានអញ្ជេីញឯកឧត្តម កែន សត្ថា អភិបាលខេត្ត ដឹកនាំប្រតិភូខេត្ត ទៅទីក្រុងបុីហៃ ដេីម្បីចូលរួមចុះអនុស្សរណះយោគយល់គ្នាបន្តទៀតនៅឆ្នាំ២០២០ខាងមុខ។
ឯកឧត្តម កែន សត្ថា អភិបាលខេត្ត បានវាយតម្លៃខ្ពស់នូវកិច្ចសហប្រតិបត្តិការកន្លងមក និងថ្លែងអំណរគុណចំពោះការជួយឧបត្ថម្ភមន្រ្តីរាជការរដ្ឋបាលខេត្តក្នុងការបណ្តុះបណ្តាលនៅក្រុងបុីហៃកន្លងមក។ ឯកឧត្តមក៏បានមានប្រសាសន៍ជម្រាបជូនអំពីសក្តានុពល ស្ថានភាពភូមិសាស្រ្តរបស់ខេត្ត និងប្រវត្តិសាស្រ្តដ៏ជូរជត់ដែលប្រទេសកម្ពុជា ប្រជាជនកម្ពុជា ធ្លាប់បានឆ្លងកាត់ពីមួយសម័យកាលទៅមួយសម័យកាល រហូតដល់ថ្ងៃរំដោះ៧មករា ឆ្នាំ១៩៧៩ និងទទួលបានសន្តិភាពពេញបរិបូរណ៍នៅឆ្នាំ១៩៩៨ ក្រោមនយោបាយឈ្នះៗរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។
ឯកឧត្តមបានបន្ថែមទៀតថា ខេត្តកែប ជាខេត្តដែលត្រូវបានបង្កេីតក្រោយគេ និងចាប់ផ្តេីមកសាងហេដ្ឋារចនាសម្ព័ន្ធចាប់ពីបាតដៃទទេគ្មានអ្វីសោះក្រោយពីថ្ងៃរំដោះ៧មករា ដូចរាជធានីខេត្តដទៃទៀតនៃប្រទេសកម្ពុជា។
ឆ្លេីយតបនឹងការអញ្ជេីញរបស់ភាគីក្រុងបុីហៃ ឯកឧត្តមអភិបាលខេត្ត នឹងពិនិត្យពេលវេលាសមស្របដេីម្បីដឹកនាំប្រតិភូទៅទស្សនះកិច្ច និងចុះអនុស្សរណះយោគយល់គ្នានៅឆ្នាំ២០២០ខាងមុខនេះហេីយឯកឧត្តមសង្ឃឹមថាចំណងមិត្តភាពនៃខេត្តក្រុងទាំងពីរនឹងកាន់តែរឹងមាំ មានកិច្ចសហប្រតិបត្តិការល្អលេីគ្រប់វិស័យ។ ឯកឧត្តមក៏បានស្នេីភាគីក្រុងបុីហៃ នូវការបណ្តុះបណ្តាលភាសាចិនដល់មន្រ្តីរាជការខេត្តកែបបន្តទៀត ហេីយជាការឆ្លេីយតបភាគីក្រុងបុីហៃបានឯកភាពតាមសំណេី។
