បើករថយន្តស៊េរីទំនើបមិនប្រយត្ន័ជ្រុលបុករបាំងថ្មចែកផ្លូវក្រឡាប់ផ្ងាជើងច្រង៉ាង
ភ្នំពេញ៖ បុរសម្នាក់រួមដំណើរជាមួយនារីម្នាក់ទៀត បានបើករថយន្តស៊េរីទំនើបបោះពួយយ៉ាងលឿនមិនប្រយ័ត្នជ្រុលទៅបុករបាំងថ្មចែកទ្រូងផ្លូវពេញទំហឹង ក្រឡាប់ផ្ងាជើង
-គ្រោះថ្នាក់ចរាចរណ៍នេះ បានបង្កការភ្ញាក់ផ្អើលដល់អ្នកដំណើរកាលពីវេលាម៉ោង១១ និង២០នាទីយប់ ថ្ងៃទី២២ ខែកក្កដា ឆ្នាំ២០១៩ នៅចំណុចមុខផ្សារហេងលី តាមបណ្ដោយផ្លូវ២៧១ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ។
-យោងតាមប្រភពពីកន្លែងកើតហេតុបានឲ្យដឹងថា មុនកើតហេតុគេឃើញបុរសម្នាក់រួមដំណើរនិងនារីម្នាក់ទៀតបានបើករថយន្តមួយគ្រឿងម៉ាក REX TON ពណ៌ខ្មៅ ពាក់ស្លាកលេខភ្នំពេញ2BD -1151 ធ្វើដំណើរតាមបណ្ដោយផ្លូវ២៧១ ទិសដៅពីជើងទៅត្បូង ក្នុងល្បឿនយ៉ាងលឿនខណៈមកដល់ចំណុចកើតហេតុបានរេចង្កូតមកខាងឆ្វេងជ្រុលទៅបុកក្បាលនាគពុះចែកទ្រូងផ្លូវលាន់គ្រាំង ធ្វើឲ្យរថយន្តបង្កក្រឡាប់ផ្ងាជើងឡើងលើ ភ្លាមៗគេឃើញបុរសម្នាក់ និងនារីម្នាក់ បានលូនចេញពីក្នុងរថយន្ត រួចគេចខ្លួនបាត់ ។
ក្រោយកើតហេតុ សមត្ថកិច្ចមូលដ្ឋានបានចុះមកដល់ទាក់ទងជំនាញចរាចរណ៍ឲ្យមកធ្វើការវាស់វែង និងស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់ចូលខ្លួនដោះស្រាយតាមច្បាប់៕
