សង្ស័យម្ចាស់ស្រវឹងបើករថយន្តដូចហោះជ្រុលទៅបុករបាំងថ្មគងជាប់ដូចរឿងចិន
ភ្នំពេញ ៖ បុរសម្នាក់បានបើករថយន្ត លឿន ដូចហោះមិនប្រយត្ន័ជ្រុលទៅបុករបាំងថ្មចែកផ្លូវ បណ្ដាលឲ្យរថយន្តគងលើរបាំងថ្មដូចនៅក្នុងខ្សែវីដេអូរឿងហុងកុង
គ្រោះថ្នាក់ចរាចរណ៍នេះកើតឡើងនៅវេលាម៉ោង១១និង៣០នាទីយប់ថ្ងៃទី៨ ខែសីហា ឆ្នាំ២០១៩នៅចំណុចស្ទុបគីរីរម្យ តាមបណ្ដោយផ្លូវព្រះសីហនុ កែងផ្លូវលេខ១៤៣ ក្នុងសង្កាត់វាលវង់ ខណ្ឌ៧មករា ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញរថយន្តបង្កម៉ាក CAMARY ហាយព្រីកពណ៌ស្ក ពាក់ស្លាកលេខភ្នំពេញ2U-2929 បើកបរដោយបុរសម្នាក់ ធ្វើដំណើរតាមបណ្ដោយផ្លូវព្រះសីហនុ ទិសដៅពីកើតមកលិចក្នុងល្បឿនយ៉ាងលឿន ខណះមកដល់ចំណុចកើតហេតុ ក៏ជ្រុលចង្កូតទៅបុករបាំងថ្មពុះចែកទ្រូងផ្លូវ បណ្ដាលឲ្យរថយន្តគងលើរបាំងថ្មទៅមុខលេងរួច សំណាងល្អគ្មានអ្នករងរបួស ។
ក្រោយកើតហេតុសមត្ថកិច្ចជំនាញចុះមកធ្វើការវាស់វែងយករថយន្តបង្ក ទៅរក្សាទុក នៅការិយាល័យចរាចរណ៍ផ្លូវគោក រាជធានីភ្នំពេញ រង់ចាំដោះស្រាយតាមច្បាប់៕
