រន្ធត់ណាស់! បុរសម្នាក់រថយន្តកុងទីន័រកិនបែកក្បាលស្លាប់យ៉ាងអាណោចអធម៌
ភ្នំពេញ ៖ រន្ធត់ណាស់ បុរសម្នាក់ត្រូវរថយន្តកុងទីន័រ កិនបែកក្បាលស្លាប់ភ្លាមៗគួរឲ្យសង្វេក ៖ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង២ និង៥០នាទីរំលងអាធ្រាត ចូលថ្ងៃទី២៤ខែសីហាឆ្នាំ២០១៩នៅ តាមបណ្ដោយផ្លូវលេខ២៧១កែងនិងផ្លូវ៣៧១ សង្កាត់ចាក់អង្រែលើ ខណ្ឌមានជ័យ ។
សពជនរងគ្រោះមានឈ្មោះ សិទ្ធ អាយុ ជាង២០ឆ្នាំស្នាក់នៅភូមិព្រែកទា សង្កាត់ចោមចៅ៣ ខណ្ឌពោធិ៍សែនជ័យ ។
តាមប្រភពព័ត៌មាននៅកន្លែងកើតហេតុបានឲ្យដឹងថា ដំបូងគេឃើញរថយន្តកុងតឺន័រមួយគ្រឿងមិនចាំស្លាកលេខ បានធ្វើដំណើរតាមបណ្ដោយផ្លូវលេខ២៧១ ទិសដៅពីកើតទៅលិច ខណៈមកដល់ចំណុចកើតហេតុបានបត់ឆ្វេងឆ្លងផ្លួវ ស្របពេលនោះបុរសរងគ្រោះ បានជិះម៉ូតូមួយគ្រឿងម្នាក់ឯងតាមបណ្ដោយផ្លូវ២៧១ដូចគ្នា ទិសដៅពីលិចទៅកើតបញ្ច្រាស់គ្នា ជ្រុលទៅបុកជាមួយរថយន្តកុងទីន័រ ពេញទំហឹង បណ្ដាលឲ្យជនរងគ្រោះដួលចូលក្រោមកង់រថយន្តកិនបែក្បាលចេញខួរស្លាប់មួយរំពេច ចំណែកម៉ូតូរងការខូចខាតផ្នែកខាងមុខ។ បន្ទាប់ពីកើតហេតុរថយន្តបង្ក បន្ថែមលឿនបើកគេចបាត់ស្រមោល ។
ក្រោយកើតហេតុ សមត្ថកិច្ចមូលដ្ឋានបានចុះមកដល់រួចទាក់ទងទៅសមត្ថកិច្ច មកធ្វើការវាស់វែងយកម៉ូតូជនរងគ្រោះទៅរក្សាទុក រងចាំប្រគល់ឲ្យទៅសាច់ញាតិ។
ដោយឡែកសពជនរងគ្រោះត្រូវបានសមត្ថកិច្ចធ្វើកំណត់ហេតុប្រគល់ឲ្យសាច់ញាតិដឹកយកទៅស្រុកកំណើតធ្វើបុណ្យតាមប្រពៃណី ៕
