ជិះម៉ូតូលឿនមិនប្រយត្ន័វាក់និងឡានជ្រុលចង្កូតបុកឃឿនចិញ្ចើមផ្លូវដួលបោកក្បាលស្លាប់
ភ្នំពេញ ៖ យុវជនម្នាក់ចេញពីផឹកសុីជាមួយមិត្តភ័ក្រ ជិះម៉ូតូលឿនមិនប្រយត្ន័វាក់ជាមួយរថយន្តខាងមុខជ្រុលទៅបុកឃឿនចិញ្ចើមផ្លូវដួលបោកក្បាលស្លាប់
គ្រោះថ្នាក់ចរាចរណ៍ដ៏រន្ធត់នេះកើតឡើងកាលពីវេលាម៉ោង២និង២០នាទីរំលងអធ្រាត ចូលថ្ងៃទី២ខែកញ្ញាឆ្នាំ២០១៩ នៅតាមបណ្ដោយផ្លូវព្រះស៊ីសុវត្ថិកែងផ្លូវលេខ២៤០ សង្កាត់ចតុមុខ ខណ្ឌដូនពេញ ។
សពជនរងគ្រោះ មានឈ្មោះ មាស សុខម៉េង អាយុ២០ឆ្នាំមុខរបរជាងឡានស្នាក់នៅសង្កាត់ទួលសង្កែទី២ ខណ្ឌឬស្សីកែវ មានស្រុកកំណើត សង្កាត់ព្រែកហូរ ក្រុងតាខ្មៅ ខេត្តកណ្ដាល ។
ប្រភពព័ត៌មានពីប្រជាពលរដ្ឋ នៅកន្លែងកើតបានឲ្យដឹងថា ដំបូងគេឃើញជនរងគ្រោះជិះម៉ូតូធំម៉ាក DUCATI ពណ៌ខ្មៅ ស្លាកលេខ ភ្នំពេញ 1CQ-8898 ម្នាក់ឯងធ្វើដំណើរតាមផ្លូវព្រះស៊ីសុវត្ថិ ទិសដៅពីត្បូងទៅជើង ក្នុងល្បឿនយ៉ាងលឿន ខណៈមកដល់ចំណុចកើតហេតុ វាក់និងរថយន្តនៅខាងមុខក៏ជ្រុលចង្កូតទៅបុកខឿននៅចិញ្ចើមផ្លូវផ្លោងជាង៥០ម៉ែត្រ ដួលបោកក្បាលនឹងថ្នល់ស្លាប់គួរឲ្យរន្ធត់ ។
ក្រោយកើតហេតុ សមត្ថកិច្ចមូលដ្ឋាន និងសមត្ថកិច្ចជំនាញ ចុះមកធ្វើការវាស់វែងយកម៉ូតូជនរងគ្រោះទៅរក្សាទុក រង់ចាំប្រគល់ឱ្យសាច់ញាតិ ។ ចំណែកសពត្រូវបានសមត្ថកិច្ចធ្វើកំណត់ហេតុប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
