មេក្លោងជួញដូរគ្រឿងញៀនម្នាក់ រួមនិងថ្នាំញៀនជាង២គីឡូក្រាម ត្រូវសមត្ថកិច្ចបង្ក្រាបបាននៅខណ្ឌចំការមន
ភ្នំពេញ)៖ ជនសង្ស័យម្នាក់ជា មេក្លោងចែកចាយគ្រឿងញៀន ត្រូវសមត្ថកិច្ចបង្ក្រាបបាន និងដកហូតថ្នាំញៀនជាង ២គីឡូក្រាម
សមត្ថកិច្ចមន្ទីរប្រឆាំងគ្រឿងញៀន បានឲ្យដឹងនៅរសៀលថ្ងៃទី០២ខែសីហា ឆ្នាំ២០១៩ថា ប្រតិបត្តិការនេះធ្វើឡើងកាលពីល្ងាចថ្ងៃទី៣១ ខែសីហា ឆ្នាំ២០១៩ នៅចំណុចបន្ទប់ជួលលេខ៤០៣ ផ្ទះលេខ៩AB ផ្លូវ២៨៨ កែងផ្លូវលេខ១១៣ ក្រុម៤១ ភូមិ៧ សង្កាត់បឹងកេងកង២ ខណ្ឌចំការមន រាជធានីភ្នំពេញ ដោយកម្លាំងជំនាញ (ក១)នៃមន្ទីរប្រឆាំងគ្រឿងញៀន។
សមត្ថកិច្ចបន្តថា ដោយអនុវត្តតាមការបញ្ជាដឹកនាំរបស់ នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ និងលោកឧត្តមសេនីយ៍ឯក ឡឹក វណ្ណៈ មន្ទីរប្រឆាំងគ្រឿងញៀន និងដឹកនាំផ្ទាល់ដោយលោកឧត្តមសេនីយ៍ត្រី អ៉ិន សុង នាយករងមន្ទីរប្រឆាំងគ្រឿងញៀនសហការជាមួយកម្លាំងមូលដ្ឋាន ក្រោមការសម្របសម្រួលដោយលោក ប្លង់ សុខផល ព្រះរាជអាជ្ញារង។
សមត្ថកិច្ចបានបញ្ជាក់ថា មេក្លោងចែកចាយថ្នាំញៀនដែលសមត្ថកិច្ចបង្ក្រាបបានមានឈ្មោះ សុខ ម៉ាត់លី អាយុ៣១ឆ្នាំ បន្ទាប់ពីឃាត់ខ្លួនសមត្ថកិច្ច បានដកហូតវត្ថុតាង ថ្នាំញៀន ទម្ងន់ ២,៤៨៧.៨២ក្រាម ស្មើនឹង២.៤គីឡូក្រាម រួមមាន៖ អ៊ិចស្តាស៊ី (ម្សៅ) ១,៥៦៣.៩០ក្រាម, អ៊ិចស្តាស៊ី (គ្រាប់) ២២៤.៩១ក្រាម, កេតាមីន (ម្សៅ) ៤១៩.១៥ក្រាម, មេតំហ្វេតាមីន (ICE) ២៧៦.០៤ក្រាម, នីមេតាហ្សាប៉ាម ៣.៨២ក្រាម, ជញ្ជីងថ្លឹង២គ្រឿង និងទូរស័ព្ទដៃ១គ្រឿង។
បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿង ដើម្បីចាត់ការបន្ដតាមនិតិវិធីច្បាប់៕
