ម្ចាស់កសិដ្ឋានចិញ្ចឹមជ្រូក អំពាវនាវឲ្យអាជ្ញាធរ និងសមត្ថកិច្ចជួយសង្រ្គោះ! ខណៈសត្វជ្រូកជាច្រើនពាន់ក្បាល កំពុងរងការជន់លិចដោយទឹកជំនន់
ព្រះវិហារ៖ បើយោងតាមសេចក្តីរាយការណ៍ពី ម្ចាស់កសិដ្ឋានចិញ្ចឹមជ្រូកមួយកន្លែង នៅភូមិស្រែព្រាង ឃុំប្រមេរុ ស្រុកត្បែងមានជ័យ ខេត្តព្រះវិហារបានឲ្យដឹងនៅរសៀល ថ្ងៃ៩ខែកញ្ញា ឆ្នាំ២០១៩ ថាទឹកជំនន់បានហក់ឡើងយ៉ាងខ្លាំង បណ្តាលឲ្យលិចកសិដ្ឋានចិញ្ចឹមជ្រូករបស់គាត់ ធ្វើឲ្យសត្វជ្រូករបស់គាត់បាត់បង់ជាច្រើនក្បាល និងជាច្រើនក្បាលទៀតកំពុងជួយសង្រ្គោះ។
ម្ចាស់កសិដ្ឋានចិញ្ចឹមជ្រូក លោក នន់ វណ្ណី បានថ្លែងថា មកដល់ពេលនេះសកម្មភាពសង្គ្រោះសត្វជ្រូក កំពុងតែដំណើរការយ៉ាងញាប់ដៃញាប់ជើង ដោយសារទឹកជំនន់កាន់តែហក់ឡើងទៅៗ មិនមានការស្រកចុះសោះ។
លោក នន់ វណ្ណី បន្តថា សត្វជ្រូកនៅក្នុងកសិដ្ឋានរបស់គាត់មានចំនួន៣,៦០០ក្បាល ពេលនេះកំពុងធ្វើការសង្រ្គោះបានជាង១,០០០ក្បាលហើយ និង១០០ក្បាលទៀត បានបាត់បង់ដោយសារ វាលោតចេញពីទ្រុង។
ម្ចាស់កសិដ្ឋានរូបនេះ បានអំពាវនាវឲ្យអាជ្ញាធរខេត្តព្រះវិហារ អាជ្ញាធរស្រុកត្បែងមានជ័យ និងសមត្ថកិច្ចពាក់ព័ន្ធជួយអន្ដរាគមន៍សង្រ្គោះសត្វជ្រូករបស់គាត់ផង ព្រោះពេលនេះទឹកនៅតែបន្តហក់ឡើង៕
