អាសូរ!! សន្តិសុខ ខារ៉ាអូ(ចេ)ម្នាក់ត្រូវរថយន្តបុកបាក់ជើងម្ខាង
ភ្នំពេញ៖ អាណិតណាស់! សន្តិសុខខារ៉ាអូខេម្នាក់ ត្រូវរថយន្ត បុកបាក់ជើងម្ខាង
គ្រោះថ្នាក់ចរាចរណ៍នេះភ្ញាក់ផ្អើលកាលពីវេលាម៉ោង០៧និង ៤០នាទីព្រឹកថ្ងៃទី ២៣ ខែកញ្ញាឆ្នាំ ២០១៩ នៅមុខខារ៉ាអូខេ(ចេ)តាមផ្លូវលេខ ៤៨៨ ផ្សារដើមថ្កូវខណ្ឌចំការមន ។
បុរសជនរងគ្រោះមានឈ្មោះ ភាព អាយុ៣៥ឆ្នាំមុខរបរ សន្តិសុខខារ៉ាអូខេ(ចេ)ស្នាក់នៅកន្លែងកើតហេតុ ។ ចំណែកអ្នកបើករថយន្តមានឈ្មោះ ប៉ាវ សូមុត អាយុ៥៣ឆ្នាំមុខរបរមន្ត្រីរាជការស្នាក់នៅភូមិ៨សង្កាត់បឹងត្របែក ខណ្ឌចំការមន។
បើតាមប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់បើករថយន្តម៉ាកប៉ាជេរ៉ូពណ៌ទឹកប្រាក់ ស្លាកលេខភ្នំពេញ 2AA-4029 តាមបណ្ដោយផ្លូវ៤៨៨ក្នុងទិសដៅពីលិចទៅ កើត លុះមកដល់ចំណុចកើតហេតុរថយន្តបានបត់ចូលខារ៉ាអូខេ (ចេ)បំណងចូលទៅបង់លុយនៅសាខាពន្ធដារខណ្ឌចំការមនដែលនៅក្បែរកន្លែងកើតហេតុ ពេលនោះជនរងគ្រោះបាន សារ៉េឡាននៅពីមុខស្រាប់តែអ្នកបើកឡានច្រឡំជាន់ហ្គែរធ្វើឲ្យរថយន្តជ្រុលទៅបុកបុរសជាសន្តិសុខពេញទំហឹងបណ្ដាលឲ្យរងរបួសបាក់ជើងខាងឆ្វេងតែម្ដង ភ្លាមៗរថយន្តមិនទាន់អស់ល្បឿនក៏ជ្រុលទៅបុកម៉ូតូ វ៉េវ ពណ៌ខ្មៅពាក់ស្លាកលេខ ភ្នំពេញ 1P-7614 មួយគ្រឿងទៀតដែលចតនៅស្ងៀមនឹងបន្តទៅបុកជញ្ជាំង ខារ៉ាអូខេ បណ្តាលឲ្យរងការខូចខាតផ្នែកខាងមុខយ៉ាងដំណំ បន្ទាប់មកកម្លាំងសមត្ថកិច្ចមូលដ្ឋានចុះទៅដល់កនិងទាក់ទងទៅរថយន្តសាមុយដឹកជនរងគ្រោះទៅសង្គ្រោះនៅមន្ទីរពេទ្យរុស្ស៊ី ។ រីឯអ្នកបើកយន្តត្រូវបានសមត្ថកិច្ចឃាត់ខ្លួនភ្លាមៗតែម្តងនិងបានយកទៅសួរនាំនៅប៉ុស្តិ៍នគរបាលរដ្ឋបាលផ្សារដើមថ្កូវ។
ក្រោយមកសមត្ថកិច្ចមូលដ្ឋានបានសហការជាមួយសមត្ថកិច្ចជំនាញចរាចរណ៍ខណ្ឌចំការមនចុះទៅវាស់វែងនិងប្រគល់យករថយន្តនិងម៉ូតូទៅរក្សាទុកនៅការិយាល័យចរាចរណ៍ជផ្លូវគោករាជធានីភ្នំពេញរងចាំដោះស្រាយគ្នានៅពេលក្រោយ ៕
