ជិះម៉ូតូលឿនមិនប្រយត្ន័បុករថយន្តកុងទីន័រចតនៅចិញ្ចើមផ្លូវស្លាប់យ៉ាងអាណោចអធម៌
ភ្នំពេញ ៖ បុរសម្នាក់ជិះម៉ូតូលឿនមិនប្រយត្ន័ជ្រុលទៅបុកគូទរថយន្តកុងទីន័រពីក្រោយស្លាប់នៅនិងកន្លែងយ៉ាងអាណោច អធម៌
គ្រោះថ្នាក់ចរាចរណ៍ដ៏រន្ធត់នេះកើតឡើងនៅវេលាម៉ោង០២និង១០នាទីរំលងអាធ្រាត្រ ចូល ថ្ងៃទី២៥ ខែកញ្ញា ឆ្នាំ២០១៩ នៅតាមបណ្ដោយផ្លូវវេងស្រេង ក្នុងសង្កាត់ចោមចៅ ទី១ ខណ្ឌពោធិ៍សែនជ័យ ។
សពជនរងគ្រោះមានឈ្មោះ តុង ឆេង ភេទប្រុសអាយុ៣១ឆ្នាំមុខរបរចុងភៅ នៅភោជនីយដ្ឋាន ជនោរក្បាលកោះ ស្នាក់ផ្ទះជួលម្តុំបឹងត្របែក មានស្រុកកំណើត ភូមិអូ ស្រុកជុំគីរី ខេត្តកំពត ។
បើតាមប្រភពព័ត៌មាននៅកន្លែងកើតហេតុបានឲ្យដឹងថា មុនកើតហេតុគេឃើញរថយន្តម៉ាកFUSOប្រភេទដឹកទូកុងទីន័រ ពណ៌ត្រួយចែក ពាក់ស្លាកលេខភ្នំពេញ 3E-3804 ចតនៅលើចិញ្ចើមផ្លូវវេងស្រេង នៅចំណុចកើតហេតុខាងលើ បន្ទាប់មកក៏មានបុរសម្នាក់ជិះម៉ូតូមួយគ្រឿងម៉ាកហុងដាឌ្រីម ឆ្នាំ2019 ពណ៌ខ្មៅ គ្មានស្លាកលេខ បើកយ៉ាងលឿន មិនប្រយ័ត្នក៏ជ្រុលចង្កូតទៅបុកនឹងរថយន្តពីក្រោយពេញទំហឹង បណ្ដាលឲ្យម៉ូតូចូលក្រោមរថយន្ត ចំណែកជនរងគ្រោះបោកក្បាលនិងរថយន្តស្លាប់ភ្លាមៗនៅនឹងកន្លែង។
ក្រោយកើតហេតុសមត្ថកិច្ចមូលដ្ឋាន និងជំនាញចុះមកធ្វើការវាស់វែង យកម៉ូតូ និងរថយន្ត ទៅរក្សាទុកនៅការិយាល័យចរាចរណ៍ផ្លូវគោក រាជធានីភ្នំពេញ រងចាំដោះស្រាយតាមច្បាប់ ។ ដោយឡែក សពជនរងគ្រោះ សមត្ថកិច្ចធ្វើកំណត់ហេតុប្រគល់ឱ្យសាច់ញាតិ យកទៅធ្វើបុណ្យតាមប្រពៃណី ៕
