ម៉ូតូ២គ្រឿងបុកគ្នានៅផ្លូវជាតិលេខ៣ស្លាប់២នាក់និងទៀតរបួសធ្ងន់
ភ្នំពេញ៖ យ៉ាងហោចណាស់បុរស២នាក់បានស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ ម៉ូតូពីរគ្រឿងបុកគ្នានៅផ្លូវជាតិលេខ៣ កាលពីវេលាម៉ោង០៨ និង៤០នាទីយប់ ថ្ងៃទី២៤ ខែកញ្ញា ឆ្នាំ២០១៩ ស្ថិតក្នុងសង្កាត់ ពងទឹក ខណ្ឌដង្កោ ។
សពជនរងគ្រោះដែលស្លាប់ទាំង២នាក់ ៖ ទី១ មានឈ្មោះ ចាន់ សុធារិទ្ធ(ហៅម៉ាប់) ភេទប្រុស អាយុ២៣ ឆ្នាំ មុខរបរកម្មករសំណង់ មានស្រុកកំណើតនៅខេត្តកំពត ជាភាគីខាងម៉ូតូZoomer X ពណ៌ស ពាក់ស្លាកលេខភ្នំពេញ1BX-7299 ។ និងទី២ឈ្មោះ ងុយ ប៉ក ភេទប្រុស អាយុ២៣ឆ្នាំមានស្រុកកំណើតនៅ ខេត្តតាកែវ ជាភាគីខាងម៉ូតូហុងដាឌ្រីម ០១៦ពណ៌ខ្មៅ ពាក់ស្លាកលេខតាកែវ 1M-1189 និងបុរសម្នាក់ទៀតរងរបួសធ្ងន់ ត្រូវរថយន្តសាមុយដឹកយកទៅសង្គ្រោះបន្ទាន់នៅមន្ទីពេទ្យលោកសង្ឃ។
យោងតាមប្រភពព័ត៌មានពីកន្លែងបានឲ្យដឹងថា មុនពេលកើតហេតុ គេឃើញម៉ូតូ២គ្រឿងធ្វើដំណើរបញ្ច្រាស់ទិសគ្នា ក្នុងល្បឿងយ៉ាងលឿន ខណៈមកដល់ចំណុចកើតហេតុបានបុកគ្នាចំពីមុខពេញទំហឹងបណ្ដាលឲ្យបុរស២នាក់ស្លាប់ភ្លាមៗ ចំណែកម្នាក់ទៀតរងរបួសធ្ងន់ ត្រូវរថយន្តសាមុយដឹកយកទៅសង្គ្រោះបន្ទាន់នៅមន្ទីពេទ្យ ។
ក្រោយកើតហេតុ សមត្ថកិច្ចមូលដ្ឋាននិងជំនាញបានមកដល់កន្លែងកើតហេតុធ្វើការវាស់វែងយកម៉ូតូទាំងពីរគ្រឿងទៅរក្សាទុកនៅការិយាល័យចរាចរណ៍ផ្លូវគោក រងចាំដោះស្រាយតាមច្បាប់ ។ ចំណែកសពជនរងគ្រោះទាំងពីរនាក់ សមត្ថកិច្ចធ្វើកំណត់ហេតុប្រគល់ឲ្យសាច់ញាតិដឹកយកទៅធ្វើបុណ្យតាមប្រពៃណី ៕
